تاند- د پلازمېنې کابل لوی واټونه نن د زرګونو هزاره لاریونوالو، چې د بامیان له لارې د ترکمنستان د برېښنا د لېږدېدو غوښتونکي دي، له لوري بند شوي دي.
پولیسو تېره شپه د ښار په حساسو سړکونو کې کانتینرونه او لوی موټر درولي څو د مظاهره چیانو مخه ډب شي.
د ښار اکثره دوکانونه او سوداګري مرکزونه بند دي.
دا روښنايي غورځنګ په نوم د بامیان له لارې د برېښنا د مزو د لېږدېدو لپاره په کابل کې د هزاره ګانو دوهمه ستره مظاهره ده. تېره مظاهره د مې په میاشت کې شوې وه او زرګونو کسانو پکې ګډون کړی و خو وروسته حکومت د مظاهره چیانو له استازو سره د خبرو په نتیجه کې پرېکړه وکړه چې د ترکمنستان برېښنا دې له خنجان څخه بامیان ته ولېږدول شي.
په پیل کې پلان دا و چې له جنوبي سالنګ څخه به یو مزی د غوربند ولسوالي له لارې بامیان ته انتقالېږي خو د هزاره ګانو استازو ویل چې غوربند ناامن دی.
د نننۍ مظاهرې مشران وايي چې تر کابل او نورو ۱۲ ولایتونو پوري دې د ترکمنستان برېښنا د بامیان له لارې ولېږدول شي.
مظاهره چیانو د ولسمشر محمد اشرف غني او اجرايي رييس عبدالله پر ضد شعارونه ورکړل او نارې یې وهلې«مرګ پر تبعیض»