تاند- په کابل او د افغانستان په ګڼو نورو سیمو کې د سختې واورې او اورښتونو له کبله د افغانستان حکومت نن ورځ /یکشنبه/ عمومي رخصتي اعلان کړه.
د افغانستان ملي تلویزیون تېره شپه رخصتي اعلان کړه خو ډېر خلک خبر نه شول او نن سهار دفترونو ته روان شول.
د وروستیو واورو د اورېدو له کبله د کابل – کندهار او سالنګ په شمول اکثره لویې او کوچنۍ لارې بندې شوي او په یو شمېر سیمو کې راشي راغلي دي.
نن سهار وختي د پروان ولایت په سرخ پارسا ولسوالي کې د واورې د ښویېدو له کبله یو شمېر کورونه لاندې شول. تراوسه پوري د دې پېښې د احتمالي مرګ ژوبلو په اړه کره معلومات نه دي ترلاسه شوي خو ویل کېږي چې د دې غرنۍ ولسوالۍ لارې هم بندې دي.
په زابل او هلمند کې سېلونو مالي تاوانونه پېښ کړي دي.
په نورستان، بدخشان، میدان وردک، لوګر او یو شمېر نورو ولایتونو کې د لارو د بندېدو له کبله خلک د خوراکي موادو له کمښته شکایت کوي.
د وروستیو راپورونو له مخې په سالنګونو کې د واورې اندازه تر ۳ مترو اوښتې ده.
سره له ډېرو مشکلاتو، ډېر خلک وروستیو ورښتونو ته خوشاله دي او هیله لري چې راتلونکی کال به یې حاصلات ښه وي.