تاند- د سربیا د کورنیو چارو وزارت نن /پنجشنبه/ وویل، د دغه هیواد د جنوب په یوه ترافیکي پېښه کې ۲ افغان پناه غوښتونکي مړه او ۱۰ نور ژوبل شول.
د ایشیا نیوز چاینل د راپور له مخې، پېښه هغه مهال وشوه چې یو زوړ موټر له سړکه واوښت.
د موټر چلوونکی، چې باور کېږي انساني قاچاقبر به و، د پېښې له ځایه تښتېدلی دی.
ټپیان د نیس ښار روغتون ته وړل شوي دي.
نیس د سربیا له پلازمېنې بلګراده ۲۰۰ کیلومتره جنوب لور ته دی.
تېر کال د سربیا له لارې په لکونو پناه غوښتونکي لوېدیځې اروپا ته لاړل.
دغه هیواد د سږکال په مارچ میاشت کې هغه لاره بنده کړه چې مهاجر پرې ورتلل خو سرب چارواکي اټکل کوي چې یولکو لس زره تنه د هنګري او سربیا له پولې اوښتي دي. دا پوله په ازغنو سیمونو تړل شوې هم ده.
د روانې اوونۍ د دوشنبې په ورځ سرب پوله ساتو ۲ تنه د ۷۷ پناه غوښتونکو د قاچاق کولو په تور ونیول.
۷۷ تنه پناه غوښتونکي په یوه باري موټر کې پټ کړای شوي ول.
د ملګرو ملتو د کډوالو لویه کمیشنري (یواین ایچ سي ار) اټکل کوي چې په سربیا کې ۷۰۰ مهاجر مېشت شوي دي.
سربیا یو اروپايي هیواد دی چې د جنوب ختیځې او مرکزي اروپا ترمنځ په لاره کې موقعیت لري.