منبع: الجزیره نيټ
ژباړه: اشرف وحدت
که څه هم د ۲۰۱۱ کال له مارچ له میاشتې راهیسې په سوریه کې د پاڅون له امله د سوري پوځ وړتیاوې نیمايي ته راښکته شوې دي، مګر د لندن د ستراتیژیکو مطالعاتو د نړیوال مرکز د تحقیقاتو له مخې، لا هم دغه پوځ له نظري پلوه، د عربی نړۍ په کچه یو قوي پوځ بلل کېږي.
د هغه راپور پر اساس، چې په ۲۰۱۳کال کې د دغه مرکز له خوا د عسکري وړتیاوو په اړه خپور شوی، له نظري پلوه د سوریې د ټول پوځ شمیر ۱۷۸ زره ښودل شوی دی، چې ۱۱۰ زره یې ځمکني، پنځه زره سمندري، ۲۷ زره هوايي او ۳۶ زره د هوايي دفاع په برخه کې دنده لري.
د دغه مرکز په راپور کې ویل شوي، چې په سوریه کې د جګړو له پیل وروسته، په پوځ کې د درز د رامنځته کېدو، تیښتې او هغو زیانونو له امله، چې دغه پوځ ته اوښتي دي، د سوریې د پوځ نظري وړتیاوې آن نیمايي ته را ټیټې شوې دي.
پوځي تجهیزات
پوځ پر روسي تجهیزاتو سمبال دی، چې په دغه هېواد کې يې له شخړو مخکې ۴۹۵۰ ټانګونه درلودل.
د یاد شوي مرکز له خوا د پوځي وړتیاوو راپور ښيي، چې دغه شمېر د روانې کورنۍ جګړې په نتېجه کې ډېر راکم شوی دی، د دغه راپور په اساس، د سوریې پوځ په حلب کې د توغندیو یوه لویه زېرمه هم لري.
هوايي ځواک یې په ۲۰۰۹ کال کې ۳۵۶ جنګي الوتکې درلودې، چې د دغه ۵۵۵ ډوله الوتکو لویه برخه یې، د شوروي ساخت دي.
باید وویل شي، چې دغه ارقام په سوریه کې تر جګړې وړاندې ترتیب شوي دي، چې اوس دغه ارقام ډېر راښکته شوي.
د ستراتیژیکو مطالعاتو دغه مرکز وایي، چې د دغه هوايي ځواک یوه لویه برخه یې لازمې وړتیاوې نه لري، مګر د هوايي دفاع قوتونه د روانې کورنۍ جګړې له امله ډېر زیانمن نه ښکاري او زرګونه روسي ساخت له ځمکې څخه هوا ته ویشتل کېدونکي توغندي لري، چې ځینې یې نوي او فعال دي.