د سیمه ییزو ارګانونو خپلواکه اداره
خبرپاڼه
۱۳۹۳-۲-۶
له سیمه ییزو ادارو څخه را رسېدلي راپورونه وایي، چې د هیواد په څلورو ولایتونو ( سرپل، جوزجان، فاریاب او بادغیس) کې د سختو سیلابونو له امله خلکو ته ګڼ شمیر مالي او ځاني زیانونه اوښتي دي.
د سیمه ییزو ارګانونو خپلواکې ادارې، مسوولین، د دې پېښو له کبله د زیانمنو شویو کورنیو سره د تسلیت او ډاډګېرنې ژور مراتب شریکوي.
د سیمه ییزو ارګانونو خپلواکه اداره د یادو پیښو د قربانیانو سره هر ډول همکارۍ ته ژمنه ده او له همدې امله، په خپلو سیمه ییزو ادارو ټینګار کوي، چې له سیلاب ځپلو کورنیو سره د همکارۍ جدي ګامونه پورته کړي.
دې ادارې، پر نړې��الو مرستندویه بنسټونو غږ کړی، چې د بېړنیو پېښو پر وړاندې د مبارزې کمېټې په چوکاټ کې، د پېښو له قربانیانو سره عاجلې مرستې وکړي.
د سیمه ییزو ارګانونو خپلواکه اداره، د پېښو له قربانیانو سره د افغانستان د ملي پوځ د پر وخت او ژغورونکو مرستو څخه مننه کوي او دا کار د خلکو او وطن پر وړاندې د ملي پوځ د سترو مسوولیتونو د اداینې بل عملي ګام ګڼي.
د دې ادارې د لوی رییس عبد الخالق فراهي په مشرۍ، یو لوړ پوړی دولتي پلاوی د زیانمنو شویو خلکو ته د مرستو جلبولو او همغږۍ په موخه یادو ولایتونو ته پر سفر روان دی او ډېر ژر به د خپلو ارزیابیو راپورونه، له اړوندو ادارو سره شریک کړي.
د یادولو وړ ده، چې په یادو ولایتونو کې د تیرې ورځې سیلابونو د راوتو له امله ګڼ شمېر هېوادوال مړه او ټپیان شوي دي. همداراز یې څاروي وژل شوي او کورونه او کرنیزې ځمکې یې سیلابونو لاندې کړې دي.