تاند- د فاریاب والي محمد الله بتاش نن /شنبه/ وویل چې د طالبانو یو مهم قومندان، چې په دغه ولایت کې بندي و، په تېښته بریالی شوی دی.
ښاغلي بتاش خبریالانو ته وویل چې طالب قومندان ملا وکیل پرون /جمعه/ د محبس د یوه مامور په مرسته تښتېدلی دی.
بتاش وویل چې ملا وکیل خطرناک قومندان و.
له بلې خوا د فاریاب امنیه قومندان نبي جان ملا خېل وویل له محبسه د طالب قومندان د تښتېدو د څرنګوالي په باب یو پلاوی څېړنې ته ګومارل شوی دی.
تر دې مخکې هم په ځلونو د افغانستان له مختلفو محبسونو څخه طالب بندیان په تېښته بریالي شوي دي.
ویل کېږي چې د افغانستان په دولت کې په پراخه پیمانه فساد طالبانو ته د تېښتې لار اواروي.
په همدې حال کې د امریکا او د افغانستان د حکومت ترمنځ د بګرام د ۸۸ بندیانو په اړه ناندرۍ دوام لري.
د افغانستان حکومت د دغو بندیانو پر دوسیو د غور لپاره یو کمیسون ګومارلی و چې د هغه د څېړنو په پایله کې اعلان وشو چې ۷۷ یې کاملاً بېګناه دي خو د ۱۶ تنو دوسیې یې نور غور ته اړتیا لري.
د ځینو نورو راپورونو له مخې د افغانستان حکومت تراوسه پوري د بګرام له محبسه په سلګونو بندیان خوشي کړي او ټاکل شوې ده چې په راتلونکو څو ورځو کې نور هم خوشي کړي.