تاند- سلګونو وسله والو طالبانو د غزني ولایت پر اجرستان ولسوالۍ یرغل وروړی، په لسګونو کسان یې وژلي او ګڼ نور ټپیان کړي دي.
د خبري رسنیو د راپور له مخې د غزني ولایتي چارواکو نن /جمعه/ وویل چې له اجرستان سره د ولایت د مرکز تماس پرې شوی او وېره ده چې ولسوالي د سخت دریځو لاس ته ورشي.
د غزني د امنیه قومندان مرستیال اسدالله صافي وویل، په اجرستان کې له پولیسو سره ارتباط پرې شوی دی.
د ده په وینا سلګونو کورنیو او بهرنیو وسله والو طالبانو پنځه ورځې مخکې پر اجرستان بریدونه پیل کړل چې د لومړنیو راپورونو له مخې په دې جګړو کې تر ۱۰۰ زیات کسان وژل شوي دي.
د غزني د والي مرستیال احمد الله احمدي وویل چې وسله والو سخت دریځو د ۱۵ تنو سرونه پرې کړي دي.
ویل کېږي چې له سیمه ییزو پولیسو سرونه غوڅ کړای شوي دي.
د طالبانو ویندوی ذبیح الله مجاهد ویلي چې ل دغو کمسانو سرونه د طالبانو له لوري پرې شوي نه دي.
د غزني چارواکو له مرکزي حکومته د فوري مرستې غوښتنه وکړه، ویې ویل چې که ژر مرسته ونه رسېږي ولسوالۍ به له لاسه ووځي.
چارواکي وايي چې یوازې هوايي مرسته دا ولسوالۍ له سقوطه ژغورلی شي.