تاند- د فاریاب ولایت له غورماچ ولسوالي څخه میمنې ته د امنیتي ځواکونو پر تلونکي کاروان د وسله والو طالبانو د حملې په نتیجه کې د دواړو خواوو ۱۴۹ تنه وژل شوي یا ټپیان دي.
د فاریاب د ولایتي شورا یوه غړي سید عبدالباقي هاشمي نن /سې شنبه/ ډي پي اې خبري اژانس ته وویل، په دې حمله کې د امنیتي ځواکونو ۲۵ غړي وژل شوي او ۲۰ نور ژوبل دي.
۳۵۰ تنه امنیتي ځواکونه، چې په ۸۰ وسایطو کې له غورماچ ولسوالي څخه د فاریاب مرکز میمنې ته روان ول، د غورماچ او قیصار ترمنځ د چهارشنبې تېپې په سیمه کې د طالبانو له حملې سره مخامخ شول.
په دې نښته کې لږترلږه ۷۳ وسله وال طالبان وژل شوي او ۳۱ نور ژوبل شوي دي.
له غورماچ څخه د دغو ۳۵۰ امنیتي ځواکونو له وتلو وروسته دا ولسوالي په بشپړ ډول د وسله والو طالبانو لاس ته ولوېده.
دا ولسوالي په ځلونو د حکومت او طالبانو ترمنځ لاس په لاس شوې ده.
د ولایتي شورا یوه بل غړي محمد نادر سیدي وویل چې د امنیتي ځواکونو او طالبانو ترمنځ د تېرې شپې په نښته کې د امنیتي ځواکونو له ۱۰ تر ۲۰ وسایط د جګړې په سیمه کې پاتې شول چې وروسته هوايي ځواک پرې بمباري وکړه او ویجاړ یې کړل.
د شاهین قول اردو سرچینې وايي چې د اردو یو هاموې زغرګاډی او یو رینجر ویجاړ شوي او ۳ نور زغرګاډي یې زیانمن شوي دي.
دوی وايي چې په جګړه کې وسله والو طالبانو ته هم درنه مرګ ژوبله اوښتې ده.