د لوی افغانستان ولسي خوځښت اعلامیه

د فاریاب ولایت د قیصار په ولسوالۍ کې د یوې کورنۍ اته غړي هغه مهال شهیدان شول، چې د سپرلۍ موټر یې د قیصار ښار او شاخ سیمې تر منځ غځيدلي سړک په اوږدو کې پر خښ شوي ماین وربرابر شو. د دې تر څنګ فاریاب ولایت د قیصار ولسوالۍ د شاخ سیمې نښتو له کبله قیصار ښار ته د نژدې ۴ زره کورنیو د کډوال کېدو رپوټونه هم ورکړل شوي دي. لوی افغانستان ولسي خوځښت د افغان وژنې په خلاف نه پخلا کیدونکې مبارزه خپله ملي، وجداني او دیني دنده بولي، مونږ په لوی افغانستان کې د افغان وژنې روانه لړۍ د هر چا له لوري او تر هر نامه لاندې چې وي په کلکو ټکو غندو. افغان وژنه نوره د زغم وړ نه ده. لوی افغانستان ولسي خوځښت مطبوعاتي کمیټه.