تاند- د خیبر پښتونخوا د مردان ښار د یوې محکمې په خوله کې دوو انتحاري حملو لږترلږه ۱۰ تنه ووژل او تر ۳۰ ډېر نور ژوبل کړل.
تر دې مخکې نن /جمعه/ په ورسک روډ د عیسویانو پر یوې مېنې برید وشو.
د مردان د پېښې په اړه راپورونه وايي چې په وژل شویو او ټپیانو کې یو شمېر پولیس هم شامل دي.
تراوسه پوري د دې بریدونو مسوولیت چا په غاړه نه دی اخیستی.
نژدې یوه میاشت پخوا د کوټې په یوه روغتون کې په ورته انتحاري برید کې تر ۷۰ زیات کسان ووژل شول.
له دې جلا د خېبرپښتونخوا په مرکز پېښور کې امنيتي چارواکي وايي چې امنيتي ځواکونو پېښور ښار ته څېرمه پر ورسک روډ د عيسايانو پر يوې استوګنيزه ښارګوټي د وسلهوالو ترهګرو بريد شنډ کړى دى.
نامعلومو وسلهوالو د جمعې په ورځ سهار نېږدې ٥ بجې د پېښور په ورسک روډ کې د عيسيانو پر يوه ښارګوټي بريد کړى، خو د مرګ ژوبلې په اړه يې لا تر دې دمه کره او دقيق معلومات نهدي ورکړل شوي.
ورسک د پېښور ښار په شمال لويديځ کې د دې ښار په ٣٠ کيلومټرۍ کې پروت دى چې د برېښنا يو بند او شاوخوا يې ځينې دولتي او پوځي ودانۍ پرتې دي.