د مرګي بي غوري او شهيد ايوبي!/ رحيم خان شيدا

کال مخکي د هلمند په امنيه قومندانۍ کي د محمد حکيم انګار په مشري د ګوندونو له استازو سره مشورتي غونډه جوړه شوي وه.

غونډه په دې موخه رابلل شوي چي څنګه کولای سو په اساني سره د پوليسو او ولس تر منځ شته واټن رالنډ او په زيمن کي پوليس مسلکي کړو؟
يادې غونډي ته زه هم د و.ا.ګ د هلمند کمېټي په استازيتوب بلل شوی وم، هلته مي خدای شاهد دی له نورو په استثناء د پوليسو په ليکو کي د شته فساد څخه وار له واره ښه بيخاره پرده پورته کړه او هيله مي څرګنده کړه چي پوليس دي په ملي روحيه وروزل شي، ملي ملي ترانه او ملي سرود دې نه يواځي دا چي ور وپيژندل سي بلکي ورباندي پياد دې هم کړی شي او ددې سره سره دې هڅه وشي چي پوليس مو حماسي سندري واوري او يو بل څه چي د بندېدلو يادونه مي وکړه هغه دا وو چي هغه تش په نوم پوليس دي د قانون منګولو ته وسپارل شي چي وظيفه نه تر سره کوي خو معاش هر وخت په ټاکلي نېټه تر لاسه کوي.

همدارنګه مي د پوليسو په ليکو کي د کم عمره ماشومانو د جلب او جذب د له منځه وړلو جدي غوښتنه وکړه، ياد څه مي هغه څه وبلل چي زموږ د پوليسو او ولس تر منځ يې واټن زيات کړی.

کله چي له غونډي راووتم شهيد ايوبي د خپل هميشني عادت له مخي ټينګ په غيږ کي ونيولم، په جالب انداز يې راته وويل:

ياره شيدا!

ليونی ځکه نه راته شکاريږي چي د يو ګوند په استازيتوب راغلی يې او زورور دې هم ځکه نه بولم چي له نورو څخه په توپير بيله کوم ساتوونکي او خيرغوښتونکي راغلی يې، خو دومره پوهيږم چي يو درد دې کړوي، هغه درد چي زه يې ښه درکولای سم.

که چيري د نظامي کس راجستر په ګوند کي جرم نه وی، نو همدا نن مي په و.ا.ګ کي ستاسو د ملګرتوب وياړ تر لاسه کوی.

په داسي حال کي چي شني بريښندونکي سترګي يې ځليدلي پسي زياته يې کړه:

زه خير هغه د شاعر خبره موږ به په ښارونو، تاسو غره کي دعا وکړئ

ګل ګل پښتونخوا ته په لمانځه کي دعا وکړئ

اوس هم موږ به دلته او تاسو هم هلته د افغانستان او افغان انسان د ژغورلو هڅي مه سپموئ.

ايوبي له ما سره کړي ژمنه وپالله او لا هم باور لرم چي پاللي به يې وی، که چيري مرګ نازوانه نازواني نه وی ورسره کړي.

د شهيد ايوبي په اړه نور هلمندوال هم وپوښتئ چي ناويلي ورڅخه واورئ، خو که بيا هم هيڅ درته ونه ويل شول، نو دده همدا کړنه چي د ځان په نظرانه کولو سره يې د لسګونه ديني عالمانو ژوند وژغوری دا هر څه ده، دا د تاريخ يو زرين باب دی او له ده سره د خوشحال بابا دا بيت ښايېږي

ښه خو دا چي د چا نوم پکي ياديږي

په فاني دنيا به نه وي ژوندي تل څوک