ژ محمداکبر حقمل معینزی
د معدې درد له خپل درد سره د بدن په نورو غړو کې هم درد رامنځته کولای شي. ډېری داسې ناروغان لیدل شوي، چې ناروغي یا درد یې د بدن په نورو غړو کې محسوسېږي او اصلي لامل یې د معدې ناروغي وي. د معدې د درد د مخنوي په موخه له لاندې لارښونو څخه ګټه واخلئ: لومړی: نانا چې ځینې وګړي ورته نعنا وايي وخورئ، خو فکر مو وي، چې له کچې زیات خوړل یې بیا کولای شي د معدې درد لا زیات کړي، یعنې په کچه یې خوړل ګټور دي. دویم: بادیان، چې ځينې وګړي ورته رازیانه وايي وخورئ؛ ځکه کولای شي د معدې ځوښ مو له منځه یوسي او د معدې د درد احساس ونه کړئ. دریم: په چای کې دارچین واچوئ او ویې څښئ؛ ځکه دارچین هم کولای شي په اړونده برخه کې تر ټولو غوره ګټې ولري. څلورم: زنجبیل یا سونډی کولای شي د معدې د درد مخه ونیسي او معده مو ځوښ ونه کړي؛ ځکه زنجبیل یا سونډي معده پیاوړې او قوي کوي، چې بیا د ډېرو څيزونو پرې زور نه رسېږي. پنځم: له اناناس څخه، چې ځینې وګړي ورته انه ناس وايي ګټه واخلئ؛ ځکه دا هم کولای شي د معدې د درد مخنیوی وکړي. شپږم: د کیوي پوست یا پوټکی وخورئ؛ ځکه دا هم کولای شي په اړونده برخه تر ټولو ګټورې پایلې ولري. اووم: له لېمو سره بوره یوځای کړئ او ویې څښئ؛ له لېمو سره د بورې یوځای والی کولای شي په ريښتینې ډول مو په ډېر لږ وخت کې د معدې له درد څخه وژغوري. اتم: ګرمې اوبه مه څښئ؛ کله مو، چې ګرمې اوبه وڅښې او یا که ځینې وخت مو یې په څښلو د سوځېدو احساس وکړ، نو پوه شئ، چې معده مو پرې زیانمنه کړه او دې برخې ته پام کولو اړین وبولئ. نهم: سوځېدلې ډوډۍ مه خورئ؛ ځکه سوځېدلې ډوډي هم کولای شي معده مو په درد کړي. محمداکبر حقمل معیزی