تاند- د طالبانو د ملا اختر محمد منصور ډلې د ملا محمد عمر اخوند زوی ملا یعقوب د افغانستان د ۱۵ ولایتونو پوځي قوماندان وټاکه.
طالبانو په یوه خبرپاڼه کې ویلي، د ملا یعقوب د ټاکنې پرېکړه د دوشنبې په ورځ /مارچ ۴- حمل ۱۶/ د طالبانو د مشرتابه شورا په یوه فوق العاده غونډه کې وشوه.
په خبرپاڼه کې دغه راز ویل شوي چې د ملا محمد عمر ورور ملا منان عمري د مذهبي چارو مشر او د طالبانو د مشرتابه شورا غړی ګومارل شوی دی.
د طالبانو ویندوی قاري یوسف احمدي ویلي، د ملا عمر زوی او ورو نوې دندې منلي او د دوشنبې له ورځې یې خپل کار پیل کړ.
د طالبانو په خبرپاڼه کې دې ته اشاره نه ده شوې چې د طالبانو شورا دا پرېکړې چیري کړي دي. خو د طالبانو د مشرتابه شورا د کوټې په شورا د دې لپاره مشهوره ده چې د پاکستان د بلوچستان ایالت په مرکز کوټه کې مېشته ده.
ویل کېږي چې د ملا عمر د کورنۍ غړي د دې لپاره ټاکل شوي چې د طالبانو ترمنځ اختلافات، چې په وروستیو کې اوج ته رسېدلي دي، لږ شي.
تر دې مخکې د طالبانو یوه مهم قوماندان ملا ذاکر د منصور مشري تایید کړه او په دې توګه یې د ملا اختر محمد منصور دریځ د ملا رسول اخوند په وړاندې غښتلی کړ.
د چارو اکثره شنونکي د طالبانو ترمنځ یووالی د افغانانو د پخلاینې لپاره مهم ګڼي او وايي، که طالبان یولاس وي او ورسره روغه جوړه وشي، په افغانستان کې سراسري سوله ټینګېدای شي.
د دوی په باور، که هره ډله له سولې لېري پاته شوه، کولی شي ګڼ جګړه مار په ځان راټول کړي.