تاند- د افغانستان د ولسمشرۍ دواړو کاندیدانو او ملګرو ملتو موافقه وکړه چې د ولسمشرۍ د انتخاباتو د دوهم پړاو د ټولو رایو په سلو کې ۴۳ دې له سره وشمېرل شي.
د ارګ له یوې خبرپاڼې سره سم د ملګروملتو خاص استازي یان کوبیش نن ماښام د دې موافقې په اړه په یوه غونډه کې، چې د ولسمشر دواړو مرستیالانو، د سترې محکمې رييس، د انتخاباتي کمیسیونونو رييسانو او استازو پکې ګډون درلود، ولسمشر کرزي ته معلومات ورکړل.
ښاغلي یان کوبیش وویل چې د ولسمشرۍ له دواړو کاندیدانو سره یې خبرې کړي او د یوناما له وړاندیز سره دواړو کاندیدانو موافقه کړې ده.
د افغانستان لپاره د ملګروملتو د مرستندوی دفتر په وړاندیز کې ویل شوي چې د څه باندې ۸ زره محلونو (رایبکسونو) رایې دې تفتیش شي.
دا د ټولو رایو په سلو کې ۴۳ یا ۳ ملیونه او ۵ لکه کېږي. د ولسمشرۍ د انتخاباتو په دوهم پړاو کې شاوخوا ۸ ملیونه رایې اچول شوي دي.
د سرمنشي حاص استازي یان کوبیش غونډې ته وویل چې دا په حقیقت کې د عبدالله عبدالله وړاندیز و چې د ده سیال ډاکتر اشرف غني احمدزي ورسره هیڅ راز مخالفت نه درلود.
ده وویل چې د دواړو کاندیدانو ترمنځ د ستونزې په حل کولو کې ملګروملتو منځګړتوب کړی او یوناما غواړي چې سبا /جمعه/ دا وړاندیز، چې دواړه کاندیدان پرې سلا دي، دواړو انتخاباتي کمیسیونونو او کاندیدانو ته په رسمي ډول وړاندې کړي.
ايا كوم تضمين هم موجود دي جه داكتر عبدالله عبدالله به يي نتيجه بيا ومني كه نه؟