تاند- د ډنمارک له پخواني صدراعظمه د ناروې پخواني صدراعظم ته د ناټو د مشرۍ مسوولیت په داسي وخت کې سپارل کېږي چې دا تړون په افغانستان کې د خپل تازه ماموریت لپاره تیاري نیسي.
په عین حال کې د اوکراین پر سر له روسیې سره د ناټو تړون اړیکې تر بل هر وخت خرابې دي.
ینس ستولتن برګ اته کاله د ناروې صدراعظم و.
ده د ناروې د کارګر ګوند مشري هم کوله.
کله چې ستولتن برګ د ناروې صدراعظم و، هیواد یې د ناټو په چوکاټ کې افغانستان ته پوځیان ولېږل.
ناروې په ۱۹۴۹ میلادي کال د ناټو د تاسیس له وخته د دغه تړون غړیتوب لري.
د ناټو دیارلسم سرمنشي په یوه سخت وخت کې خپل ماموریت پیلوي.
اندریس فوګ راسموسن، چې پنځه کلنه دوره یې بشپړه شوې، وايي چې اوس د نړۍ وضعیت له تېرو پنځو کلونو سره توپیر لري.
راسموسن د بریتانیا له انډیپنډنټ ورځپاڼې سره په مرکه کې ویلي، اوس له دوهمې نړیوالې جګړې څخه تراوسه پوري تر بل هر وخت ستونزې زیاتې دي.
ده ظاهراً په اوکرایین کې د روسیې پوځي مداخلې ته اشاره لرله چې د خپل ماموریت په دوره کې یې د ژورې مایوسۍ سبب ګڼي.
راسموسن همداراز د سې شنبې په ورځ د ناټو سرتېرو ته په یوه لیک کې ویلي چې ناټو به تر ټولو د غښتلي پوځي تړون په توګه پاتې شي.
ده زیاته کړې، ډاډه دی چې د نړیوالې ټولنې د غړیو لازمه همکاري به د نن ورځې او سبا پر ستونزو د لاسبري کېدو لپاره د ناټو د وړتیاوو ضامنه وي.
ټاکل شوې وه چې د ناټو د سرمنشي په توګه د اندریس فوګ راسموسن ماموریت د سږ کال د جولای په یودېرشمه پای ته ورسېږي، خو د دې لپاره د ده ماموریت دوې میاشتې اوږد کړای شو چې د بریتانیا په ویلز ایالت کې د ناټو په سرمشریزه کې ګډون وکړي.
Norway pawzian afghanistan ta da Kjell Magne Bondevik po dawra ke weligel na da Jens Stoltenberg, hila da islah yee kree.
Manana