تاند- د ناټو په یوه پټ سند کې ویل شوي چې د دغه تړون غړي غواړي چې په راتلونکي کې د افغان امنیتي ځواکونو ملاتړ زیات کړي.
د جرمني ډي پي اې خبري اژانس د شنبې په ورځ /نوومبر۲۱/ د ناټو له مرکز بروکسل څخه په یوه راپور کې وویل چې دیپلوماتیکو سرچینو ورته ویلي، د ناټو د وزیرانو راروانې غونډې ته یو ځانګړی راپور چمتو شوی دی.
د دې سند پر اساس ناټو د نورو موضوعاتو ترڅنګ په دې هم موافقه کړې چې له افغان امنیتي ځواکونو سره د استخباراتي معلوماتو په شریکولو غور وکړي. ویل شوي چې د استخباراتي معلوماتو شریکېدا کېدای شي له افغان امنیتي ځواکونو سره مرسته وکړي چې د طالبانو د وروستیو حملو په شان پېښو مخه ونیسي چې افغان امنیتي ځواکونه ورته تیار نه ول.
همداراز ټاکل شوې ده چې د ناټو نور روزونکي د افغانستان جنګ ځپلیو او نارامو سیمو ته واستول شي.
د راپور پر اساس په بیړنیو حالاتو کې به د ناټو هوايي ځواک بمباري کوي.
ډي پي اې وايي چې ناټو دا راپور تایید نه کړ، خو یوه ویندوی وویل چې د دسمبر په لومړۍ او دوهمه به په بروکسل کې د ناټو د بهرنیو چارو وزیرانو په غونډه کې د افغانستان پر حالاتو خبرې وشي.
په دې غونډه کې به د ناټو وزیران د خپلو ټولو ماموریتونو لپاره د ځواکونو د ورکولو ژمنې وکړي.
په افغانستان کې د ناټو په اوسني روزنیز ماموریت کې، چې د غوڅ ملاتړ ماموریت نومېږي، ۱۳ زره ځواکونه شامل دي. دوی په جګړې کې د برخې اخیستو اجازه نه لري خو د ځان دفاع کولی شي.
ګومان نه کوم چي داشړی به وړی سی