تاند- افغان پولیسو د هیواد په ختیځ کې د دوو پاکستاني اتباعو په شمول لږترلږه ۴ تنه د دولت وسله والو مخالفانو ته د وسلو برابرولو په تور ونیول.
د ننګرهار د ولایتي ادارې په وینا دا کسان د ننګرهار په مومنددره ولسوالي کې د امنیتي ځواکونو د عملیاتو په ترڅ کې ونیول شول.
د دغو کسانو، چې دوه یې پاکستانیان ښودل شوي، د نیول کېدو خبر په داسې وخت کې خپور شو چې د پاکستان د پوځ لوی درستیز جنرال قمر جاوید باجوه نن /یکشنبه/ په کابل کې د افغانستان له ولسمشر محمد اشرف غني سره وکتل.
د ننګرهار ولایتي اداره وايي، دا کسان داسې مهال ونیول شول چې غوښتل یې ۸ راکټونه په یوه نقلیه وسیله کې د دولت مخالفانو ته یوسي.