تاند- د هلمند والي ادعا کوي چې په ولایت کې یې د طالبانو د قوماندې او کنټرول مرکز له منځه وړل شوی دی.
د هلمند والي جنرال محمد یاسین د سې شنبې په ورځ په یوه خبري غونډه کې وویل چې د طالبانو د هلمند د قوماندې او کنټرول مرکز د شپې په عملیاتو کې له منځه وړل شوی دی.
د جنرال یاسین په وینا د شپې عملیات له ۲ میاشتو راهیسې پیل شوي چې په نتیجه کې یې طالبانو ته سختې مرګ ژوبلې هم اوښتي دي.
د هلمند والي او یو شمېر نور د شپې عملیات بریالي بولي خو ځینې خلک وايي چې د شپې په عملیاتو کې ډېر ځلې ملکیانو ته هم مرګ ژوبلې اوړي.
د هلمند والي بیا وايي چې یوازې په وروستۍ یوه میاشت کې د طالبانو د ۱۱ قوماندانانو په شمول د دې ډلې لږترلږه ۲۱۱ غړي وژل شوي دي.
د هلمند له والي سره په خبري غونډه کې د دې ولایت امنیه قوماندان جنرال عبدالرازق یعقوبي وویل چې د طالبانو پر ضد د عملیاتو د تشدید له کبله د امنیتي ځواکونو مرګ ژوبلې کمې شوي دي.
په وروستیو کې طالبانو په هلمند کې د خپل والي ملاعبدالمنان وژل کېدا تایید کړه.