تاند، سه شنبه، د حمل ۵مه: د هند لومړي وزیر نریندر مودي ولسمشر غني ته د نوروز او د ترکمنستان ولسمشر قربانقلي بیردي محمدوف ولسمشر غني ته په ټاکنو کې د بیا ځل بریالي کېدو او ولسمشرۍ مبارکي ویلې ده.
د هند لومړي وزیر نریندر مودي له ولسمشر غني سره په تلیفوني تماس کې ویلي، د نوروز مېله د دواړو هیوادونو ترمنځ د ګډو کلتوري اړیکو ښکارندويي کوي.
ښاغلي مودي له ولسمشر غني سره د سیمې د حالاتو تر څنګ له کوویډ۱۹ وبايي ناروغۍ سره د مبارزې په لارو چارو او ګډو اقداماتو هم هوکړه کړې ده.
هند پرون د کورونا وایرسو د مخنیوي لپاره د سارک بسپنې یا صندوق ته د یو ملیون ډالره مرستې د ورکولو په خاطر د افغانستان مننه وکړه.
له بلې خوا د ترکمنستان ولسمشر قربان قري بیردي محمدوف، ولسمشر غني ته د بیا ځلي ولسمشر کېدو مبارکي ورکړې ده.
ښاغلي محمدوف له افغانستان سره په ګډو همکاریو، متقابلو اړیکو او د باور وړ دوستانه اړیکو په دوام ټینګار کړی دی.
قربان قلي بیردي محمدوف ولسمشر غني ته د نوروز مبارکي هم ویلې او افغانستان کې یې د سولې د ټینګښت هیله کړې ده.
نوموړي همدا راز یو فرمان هم لاسلیک کړی چې له مخې به یې تر ۲۰۲۲ کاله پورې ترکمنستان له افغانستان سره بشري مرستو ته دوام ورکوي.