تاند- د هند د ملي امنیت پخوانی سلاکار وايي، هیواد یې له افغانستان څخه د بهرنیو ځواکونو پر وتلو باید اندېښنه ونه لري ځکه چې هند له افغانستان سره کومه ستونزه نه لري.
د هند د اکانومیک ټایمز ورځپاڼې د راپور له مخې، د ملي امنیت پخواني سلاکار شیوشنکر منون دا خبرې وروسته له دې وکړې چې له افغانستانه د امریکايي ځواکونو د وتلو په خبرونو په هند کې ځینو اندېښنه ښکاره کړه.
ښاغلی منون وايي، هند د سیمې یو غښتلی هیواد دی او باید اندېښمن ونه اوسي چې امریکا له افغانستانه خپل پوځیان باسي.
ده زیاته کړه، هند د دې پر ځای چې له افغانستانه د بهرنیو پوځیانو پر وتلو اندېښنه ولري، باید د پاکستان له درکه اندېښمن واوسي ځکه چې هند له افغانستان سره نه بلکې له پاکستان سره ستونزه لري.