تاند- په کابل کې د ملګروملتو مرستندوی دفتر وايي، د افغانستان د راتلونکې شنبې /میزان ۲۸ – اکتوبر۲۰/ د ولسي جرګې انتخابات به څه باندې ۲لکه ۵۰ زره څارونکي وڅاري.
په افغانستان کې د ملګروملتو استازي تدامیچي یاماموتو نن /سې شنبه/ په یوه خبرپاڼه کې ویلي چې څارونکي د انتخاباتي درغلیو په مخنیوي کې اغېزمن رول لوبولی شي.
«د بې پرې افغان څارونکو او د کاندیدانو د استازو له لوري د څه باندې ۵ زره رای مرکزونو څارنه ډېره مهمه ده. د دوی حضور د درغلۍ د مخنیوي او تشخیص لپاره تر ټولو اغېزمنه لار ده.»
ټاکل شوې ده چې څه باندې دوه نیم لکه کورني څارونکي د شنبې په ورځ د رای ورکولو په مرکزونو کې د رای ورکولو بهیر وڅاري.
په همدې حال کې د انتخاباتو خپلواک کمیسیون وايي، د انتخاباتو په ورځ به نژدې ۵۱۰۰ مرکزونه د رای ورکولو لپاره پرانیستي وي.
همداراز ۵۴ زره امنیتي ځواکونه د انتخاباتو د امنیت لپاره ګومارل شوي دي.
د افغانستان ولسي جرګه ۲۴۹ چوکۍ لري. له غزني پرته له ۳۳ ولایتونو څخه د ولسي جرګې لپاره څه باندې ۲۵۰۰ تنو ځانونه کاندید کړي چې تر ټولو ډېر کسان په کابل کې کاندید دي.