د پاکستاني طالبانو او حکومت ترمنځ د سولې د خبرو لومړی پړاو، له اوږده ځنډه وروسته، د پنجشنبې په ورځ په اسلام اباد کې پیل شو.
دا خبره د پاکستان د حکومت یوې سرچینې په داسي حال کې وکړه چې د دغو خبرو د بریالیتوب د امکان په اړه شکونه مخ پر زیاتېدو دي.
د رویټرز خبري اژانس د راپور پراساس پاکستاني طالبان د پاکستان د مرکزي حکومت د پرزولو او د شریعت د فافذولو لپاره جګړه کوي، خو صدراعظم نوازشریف باور لري چې طالبان اوس د جګړې پای ته رسولو او د خبرو له لارې د مسلې حل کولو ته تیار شوي دي.
د پاکستان د حکومت یوه چارواکي، چې نه یې غوښتل نوم یې واخیستل شي، رویټرز خبري اژانس ته وویل:«دواړه خواوې په یوه ناڅرګند ځای کې خبرې کوي او د خبرو د پرمختګ په اړه به صدراعظم نوازشریف ته راپور وړاندې شي. »
اکثرو پاکستانیانو ته له طالبانو سره، چې تقریباً هره ورځ په دغه هیواد کې حملې کوي، خبرې بې نتیجې ښکاري.
د پاکستان د سیاسي او پوځي چارو کارپوه حسن عسکري هم یو له هغو کسانو څخه دی چې د خبرو بریالیتوب ته زیاته هیله نه لري.
ده وویل:«د طالبانو او حکومت ترمنځ د خبرو پیلېدا یو ښه انکشاف دی خو په دې مرحله کې دا ډېره ګرانه ده چې څوک دې ووايي خبرې به خامخا بریالۍ کېږي ځکه چې د دواړو خواوو په دریځونو او څرګندونو کې، چې په رسنیو کې خپرې شوي دي، ډېر توپیر شته.»
په همدې حال کې داسي راپورونه هم شته چې وايي نوازشریف د سولې په خبرو کې پرمختګ ته هیله نه لري او غوره بولي چې د طالبانو پرضد له قوې څخه کار واخیستل شي.
د سې شنبې په ورځ د طالبانو او حکومتي کمېټو ترمنځ د خبرو هڅه هغه مهال ناکامه شوه چې حکومتي پلاوي د طالبانو د پلاوي د صلاحیت او د غړیو د ترکیب په اړه شکونه څرګند کړل.
د پاکستان ډان ورځپاڼې، د ځینو سرچینو په قول ویلي چې نننۍ خبرې په صادقانه چاپېریال کې ترسره شوې.
خو د دواړو خواوو مرکچیان نه دي حاضر شوي چې د خپلو خبرو په اړه نظر څرګند کړي.
تر دې مخکې د دواړو خواوو ترمنځ د خبرو د پیلېدو لپاره هلوځلو نتیجه نه ده ورکړې.
په پاکستان کې د سیاسي چارو کارپوه شوکت خټک هم وايي چې د دې خبرو نتیجه به له تېرو خبرو سره، چې په نتیجه کې یې د لنډې مودې لپاره د پوځ او وسله والو طالبانو لپاره امن رامنځته شوی خو د خلکو کړاوونو دوام کړی، توپیر ونه لري.
طالبانو د روان میلادي کال له پیله حملې لا زیاتې کړي او له دې کبله د پاکستان پوځ په شمالي وزیرستان کې عملیات زیات کړي او په جنګي الوتکو او هیلي کوپترو یې پر دې سیمې بمبارۍ کړي دي.