د پاکستان د بهرنیو چارو وزیر د امریکا د مرستې پر بندېدو توند غبرګون وښود

تاند- د امریکا د حکومت له لوري پاکستان ته د ۲۵۵ ملیون ډالره مرستې د نه ورکولو د پرېکړې له اعلانه وروسته د پاکستان د بهرنیو چارو وزیر توند عکس العمل وښود.

وروسته له دې چې د امریکا ولسمشر پاکستان د تروریزم په ملاتړ تورن کړ، د دغه هیواد د بهرنیو چارو وزارت د پاکستان په وړاندې په لومړني اقدام کې دې هیواد ته ۲۵۵ ملیون ډالره مرسته وځنډوله.

دا پیسې د ايتلاف له بسپنې څخه پاکستان ته ورکول کېدې. له دې بسپنې څخه په کال کې شاوخوا یو ملیارد ډالره پاکستان ته په څلورو پړاوونو کې ورکول کېدې.

د پاکستان د بهرنیو چارو وزیر خواجه اصف د امریکا د دې پرېکړې په غبرګون کې له واشنګټن سره د هوايي او مځکنیو ارتباطاتو د پرې کېدو غوښتنه وکړه.

خواجه اصف، چې پخوا ویلي و چې د امریکا مالي مرستو ته اړتیا نه لري، نن /جمعه/ د پاکستان له حکومته وغوښتل چې پاکستان ته د امریکايي چارواکو سفرونه وځنډوي او له دې هیواد سره هر ډول هوايي او مځکنی ازتباط ودروي.

پاکستان له امریکا سره مځکنۍ لار نه لري خو ښايي د خواجه اصف منظور د امریکايي پوځیانو اکمالاتي کاروانونه وي چې د پاکستان د کراچۍ بندر له لارې په افغانستان کې امریکايي پوځیانو ته رسول کېږي.

د ولسمشر ټرمپ حکومت ویلي، پاکستان ته ۲۵۵ ملیون ډالره مرسته تر هغو ځنډوي چې پاکستان په خپله خاوره کې د تروریستانو د پناهځایونو پر ضد اقدام کوي.

ولسمشر ټرمپ د افغانستان او جنوبي اسیا لپاره د خپلې ستراتیژۍ د اعلان په مهال ویلي و چې نور به په پاکستان کې د تروریستانو خوندي پناهځایونه ونه زغمي.

ده دا هم ویلي و «په داسې حال کې چې امریکا پاکستان ته د ملیاردونو ډالرو مرسته ورکړې، دغه هیواد د هغو تروریستانو ملاتړ ته دوام ورکړی چې موږ ورسره په جنګ یوو.»

د ټرمپ حکومت د سپټمبر تر دېرشمې پورې وخت درلود چې کانګریس ته ووايي چې ایا دا پیسې د ايتلافي ځواکونو د ملاتړ له صندوقه پاکستان ته ورکړل شي او کنه. خو د ټرمپ حکومت تر ټاکل شوې مودې یوه میاشت وړاندې اعلان وکړ چې دا پیسې پاکستان ته نه ورکوي.