د معلولیت لرونکو وګړو پنځو زونونو ترمنځ د کرکټ شل اوریزې سیالۍ چې د افغانستان کرکټ بورډ ادارې په زیار او د افغانستان لپاره د سویډن کمیټې په مالي لګښت په لاره اچول شوې وې، نن د کابل په نړیوال لوبغالي کې پای ته ورسیدې.
د پای لوبه چې د سپین غر او مس عینک معلولیت لرونکو لوبډلو ترمنځ وه، پچه یې سپین غر لوبډلې ګتلې وه او د توپوهنې پریکړه یې وکړه. د سپین غر معلولیت لرونکو لوبغاړو په ټاکل شویو شلو اورونو کې د ۸ لوبغاړو په سوځیدو سره مس عینک لوبډلې ته د ۱۳۹ منډو هدف ورکړ چې له ډلې یې محمد نبي ۴۵، صبور ۳۳ او فرهار ۲۰ منډې جوړې کړې. د مس عینک توپ اچونکو له لوري جمیل د سیالې لوبډلې درې او رفیع الله ۲ لوبغاړي وسوځول.
د مس عینک لوبډلې ورکړل شوی هدف پوره نه کړای شو او د سیالۍ په ۱۷ اوور کې یې د ټولو لوبغاړو په سوځیدو سره ۷۷ منډې جوړې او لوبه یې د سپین غر په ګټله وبایلله. د سپین غر توپ اچونکو له لوري شفیق درې او شیرین آغا د سیالې لوبډلې دوه لوبغاړي وسوځول.
د سیالۍ غوره لوبغاړی شفیق وټاکل شو چې د معلولیت لرونکو وګړو کرکټ څانګې مشر ډاکټر عبدالمنان مسعود څخه یې خپله ډالۍ ترلاسه کړه.
د پای په مراسمو کې د ولسمشر سلاکار وزیر او د کرکټ بورډ عمومي رئیس شهزاده مسعود، د کار او ټولنیزو چارو وزارت اداري او مالي معین صمیم سلطاني، د افغانستان کرکټ بورډ اجراییوي رئیس ډاکټر نورمحمد مراد، د سویډن کمیټې د معلولیت لرونکو وګړو څانګې مشر ډاکټر خالد او مرستیال یې احمد سلیم، د کورني کرکټ مسئول نظیم جار عبدالرحیم زي، د معلولینو فدراسیون رئیس حاجي رحیم شاه، د ختیځو ولایتونو د کرکټ مسئول مسعود صافي، د کرکټ بورډ کارکونکو او د رسنیو همکارانو ونډه درلودله.
سلاکار وزیر او د کرکټ بورډ عمومي مشر شهزاده مسعود په خپله وینا کې د سیالیو بریالی پرمختګ او پای ګټور وارزولو. نوموړي په نږدې راتلونکې کې د معلولیت لرونکو وګړو لپاره د ورته ګټورو سیالیو په لاره اچونې ژمنه وکړه.
د کرکټ بورډ اجراییوي رئیس ډاکټر نورمحمد مراد په دغو سیالیو کې د معلولیت لرونکو وګړو اغیزمنه ونډه له ګټورو پایلو ډکه وبلله. نوموړي د معلولیت لرونکو وګړو لپاره د یوه ښه راتلونکي زیری ورکړ او ویې وییل چې د کرکټ په برخه کې به ددوی لپاره په نږدې راتلونکې کې تر دې هم غوره زمینې مساعدې شي.
د پای په مراسمو کې د د سیالۍ غوره توپوهونکي زبیر خان ته د کورني کرکټ مسئول نظیم جار، غوره توپ اچونکي شیرین آغا ته د احمد سلیم، د سیالي غوره لوبغاړي عبیدالله ته د اجراییوي ډاکټر نورمحمد مراد، د دوهم مقام لوبډلې ته د ډاکټر خالد او ډاکټر نورمحمد مراد او لومړي مقام لوبډلې ته د سلاکار وزیر او د کرکټ عمومي رئیس شهزاده مسعود او د کار او ټولنیز چارو، شهیدانو او معلولینو وزارت اداري او مالي معین صمیم سلطاني له لوري جایزې ورکړل شوې.