پوهنیار محمد قاسم عادل په ۱۳۶۳ل. کال د هلمند ولایت ګرشک ولسوالۍ د مالګیر په کلي د الحاج عبدالظاهر په علمپروره کورنۍ کي زیږېدلی دی. ښاغلي عادل د خپل ژوند د ماشومتوب دوره په خپل پلرني ټاټوبي کي تېره کړې ده، څنګه چي کورنۍ يې یوه په پوهي او علم مئینه وه، نو په سیمه کي ورته د زده کړي زمینه نه وه مساعده، نو اړ سوه، چي د هلمند مرکز لښکرګاه ته راستانه سي.
عادل خپلي لومړنۍ زده کړي د هلمند ولايت په مرکزي لیسه کي تر سره کړي او ددې دورې د ممتازو او وړو زده کوونکو له ډلي شمېرل کېده او تر فراغت وروسته يې په ښوونځی کي د ښوونکي سپېڅلې دنده تر لاسه کړه او د ژوند په دې لړ کي يې ستر او علمي خدمتونه خپلي ټولني ته وکړه.
نوموړي د ۱۳۸۴ل. کال د کانکور په ازموینه کي ګډون وکړ او دددې پروسې په پايله کي د کندهار پوهنتون د ښووني او روزني پوهنځي ریاضي څانګي ته بریالی سو او د نوموړي په وینا له دې څانګي سره يې د ښوونځي له وخته مینه درلوده او دا زده کړي دا برخه يې په ډېر بریالتوب په ۱۳۸۹ل. کال پای ته ورسول .
ښاغلي عادل د خپل کار پیل په زده کړیزو او روزنیزو پروګرامونو کړی دی، تر لسانس اخستلو وروسته يې لومړۍ دنده په هلمند پوهنتون کي د استادۍ رښتنی او علمي مقام و. د هلمند پوهنتون د ښووني او روزني پوهنځی کي يې د لومړي ځل لپاره د ریاضي ډيپارټمنت رامنځ ته کړ، چي نن له نیکه مرغه څلور ټولګۍ لري او لومړۍ دوره يې د فارغېدو په درشل کي ده. ښاغلي عادل د استادۍ تر څنګ په نورو موسسو کي ازادي دندي ترسره کړي نوموړي په هاپو موسسه کي چي د زده کړي او د ښوونځي ښوونکو ته روزني په برخه کي ټرینینګ ورکوي د ټرينر دنده ترسره کړې ده، چي له دې لاري يې په سلګونو هلمندي ښوونکو ته بېلابېل تدریسي میتودونه ور ښودلي دي.
ښاغلي عادل تر څو کلن خدمت وروسته د پوهنتون له لوري د ماسټرۍ علمي پروګرام ته معرفي سو نوموړي خپله ماسټري د کابل د ښووني او رزوني پوهنتون د پیداګوژي په څانګه کي بشپړه کړه او په کابل کي د ماسټري تر څنګ یې په یاد پوهنتون کي تدریس هم کاوه او دا علمي دوره يې په ۱۳۹۳ل. کال سرته ورسول.
د ماسټري د علمي دورې تر فراغت وروسته په هلمند پوهنتون کي د ریاضي ديپارټمنت امر وټاکل سو او ددې څانګي چاري ، چي مخکي له ډېرو جدي ستونزو سره مخ وې حل او ټول مخته پراته خنډونه يې له منځه یوړه. عادل د خپلي پوهي او فعاليت پر بنسټ د وادې هلمند پوهنتون علمي مرستیال وټاکل سو او فعلآ د هلمند پوهنتون د ښووني او روزني پوهنځي د ریاضي څانګي امر او د وادې هلمند پوهنتون علمي مرستیال دی.
بدلون اوونيزه\لومړی کال\(۳۶) ګڼه\ چارشنبه\جوزا\ ۲۳\ ۱۳۹۴