سیف الرحمن شهاب/ ښرنه
د پکتیکا د پوهنې ریاست چارواکي وایي چې په دې ولایت کې د نجونو زده کړې د پرمختګ لپاره ټولې هغه علاقه لرونکې ښوونکې چې تحصیلي اسناد ولري او غواړي په دې ولایت کې دنده سرته ورسوي، تر زر امریکایي ډالرو معاش ورکوي.
د دې ریاست د اسلامي زده کړو د برخې امر کریم اتلوال له تاند سره په خپلو خبرو کې وویل، دوی ټولې هغه ښځینه ښوونکې چې د دولسم، څورلسم او لیسانس په کچه زده کړې ولري، په ترتیب د میاشتې په شپږ سوه ، اته سوه او زر امریکایي ډالر تنخوا باندې ګوماري. د اتل په وینا دا پیسې نړیوال بانک ورکوي.
د نوموړي په وینا (( په دې ولایت کې د ښځینه ښوونکو د نشتون په سبب د فارغو نجونو شمېر د بل هر ولایت په پرتله کم دی او دوی به هڅه وکړي چې په دې شمیر کې تر خپله وسه تغیر راولي)).
د ده پر خبره، که دوی وروسته له دې په زیات شمیر ښځینه ښوونکې په اړونده ښوونځیو کې پر دندو وګوماري، نو په دې شمیر کې به د پام وړ تغیر رامنځ ته شي.
د پوهنې ریاست چارواکي په داسې حال کې په لوړ معاش د ښځینه ښوونکو د ګومارنې خبره کوي چې په ۱۳۹۳ ه ش کال کې د ټول پکتیکا ولایت په کچه یوازې اووه تنه نجونې په لومړي ځل له دولسم ټولګي څخه فارغې شوې دي.