تاند- په کونړ او باجوړ ایجسنۍ کې مېشت مومند قوم په یوه ګډه جرګه کې د ډیورنډ کرښې په دواړو غاړو کې د سولې د ټینګېدو پرېکړه وکړه.
د پاکستان تریبیون ورځپاڼې نن په یوه راپور کې ویلي چې د مومندو دا قومي جرګه د جمعې په ورځ د مومند او باجوړ ایجنسۍ د برخالوزو او ترخو په سیمو کې د کونړ او باجوړ د قومي مشرانو او ملکانو په ګډون جوړه شوه.
ورځپاڼه وايي د جرګې برخوالو وویل چې د ډیورنډ کرښې په دواړو خواوو کې د سولې د راوستلو په اړه قومي مشران موافقې ته ورسېدل او وپتېیل شوه چې قوم به د دې هدف لپاره له نورو سره همکاري کوي.
د افغانستان د کونړ له لوري د جرګې په دوه ویشت غړیو کې مولوي عبدالحکیم، حاجي شاه محمود، مولوي عنایت الله او حاجي جان ولي او د مرورې ولسوالۍ ګل محمد شامل ول.
افغان مشرانو وویل چې دوی به هم ژر د خپلو سیمو جرګه وروبولي او د مومند ایجنسۍ د جرګې پرېکړې به پکې تایید کړي.
په دواړو جرګو پسې به د ډیورند کرښې د دواړو خواوو د قومي مشرانو او سپین ږیرو یوه لویه جرګه جوړه شي.
مومند قوم د ګڼو نورو پښتني قومونو په شان د ډیورنډ کرښې دواړو خواوو ته اوسي خو د انګرېزانو له لوري د ډیورنډ په نوم ایستل شوې کرښې د دوی ترمنځ ورورګلوي نه ده ختمه کړې.
ویل کېږي چې په سیمه کې د طالبانو د فعالیتونو او د هغو په وړاندې د پاکستاني پوځ اقداماتو د ډیورند کرښې د دواړو خواوو د مومندو ترمنځ تګ راتګ او خپلوۍ اغېزمنې کړي دي.