تاند، جمعه، د سنبلې ۲۲مه: دفاع وزارت وايي، د طالبانو لخوا تړل شوې د کابل- بغلان، کابل- مزار شریف او د بغلان – کندوز لویه لار یې ۱۳ ورځې وروسته پرانیسته.
دفاع وزارت تاند ته په یوه استولې خبرپاڼه کې ویلي، په کیله ګي، جرخشک، جنګل باغ او چهار شنبه تېپه کې یې دا مهال د طالبانو پر ضد عملیات پیل کړي دي او لارې یې هم تېره شپه ترې خلاصې کړې دي.
دفاع وزارت په دغو عملیاتو کې طالبانو ته د درنې مرګ ژوبلې اړولو ادعا هم کړې ده خو طالبانو بیا څه نه دي ویلي.
وروسته له هغې چې طالبان له پلخمري ښار څخه شاته شول، وسله والو یې د کابل او شمال د نهو ولایتونو لار په کیله ګي او دوشي کې وتړله او هیڅ موټرته یې د تګ راتګ اجازه نه ورکوله چې له کبله یې مساپر په ستونزو کې ګېر پاتې وو.