تاند- یوې ځوانې ښځې، چې خاوند یې د کابل د شنبې د شپې د واده د سالون په تروریستي برید کې وژل شوی و، ځان وواژه.
د کابل د شهردوبۍ هوټل (د ودونو سالون) په انتحاري حمله کې تر ۷۰ زیات کسان ووژل شول. د هغوی په منځ کې یو هم نجیب و. د نجیب جنازه په کابل کې خاورو ته وسپارل شوه خو له دې لږ وروسته د هغه د مېرمنې جنازه په خپل زېږنځای پکتیا کې پورته شوه.
د هغې خپلوان وايي چې د خپل خاوند له مرګه له خبرېدو وروسته یې ځان وژلی دی.
د هغې یو خپل محمد الیاس وايي«کله چې دا پوه شوه چې مېړه یې وژل شوی دی، ځان یې په خپل ټیکري زیندۍ کړ.»
د کابل د شنبې د شپې په تروریستي برید کې تر ۱۸۰ ډېر نور ټپیان شول.
د افغانستان حکومت د دې خونړۍ پېښې په خاطر نن (دوشنبه) د خپلواکۍ د سلمې کالیزې جشنونه تر یوه حده محدود کړل.
د داعش تروریستي ډلې د کابل د برید مسوولیت په غاړه واخیست.