د کابل واکمنو د((کونړبندونو)) ته سپينې تښتيدلي

بريښنا وزارت ولې له خپلو ژمنو په شاشو؟

 دا لیکنه په باور ورځپاڼه کې خپره شوې

  د چارواکو له ژمنو او د ولس له څو کلن اتنظار وروسته په ختيځ ولايت کونړ کې ديوه بريښنا بند د جوړېدو چارې رسما پيل شوې .

   د دغه کوچني بريښنا بند د جوړېدو چارې داسې مهال پيل کېږي، چې په لندن کې د افغانستان، انګلستان او پاکستان په  درې سريزه غونډه کې پاکستاني لوري ولسمشرکرزي سره په کونړ سيند د يوه لوي بريښنا بند دجوړولو هم ويلي.

    شنونکي وايي د کابل چارواکي د دغه بريښنا بندونو په جوړيدو کې دوه زړي دي اوډېرځله يې نا امني دجوړونې د چارو په مخکې يوه ستره ننګونه بللې .

   که څه هم په دغه ولايت کې ان وسله والو جنګياليو هم د ټولګټو پروژو سره خپل ملاتړ اعلان کړى او ويلي يې دي هغه ټولګټې پروژې چې پوځي موخې ونه لري، دوى ورسره مخالفت نه کوي .

   خو له ډېر انتظار وروسته دبريښنا وزارت په کونړ کې دپيج درې پر سيند د مناګي په سيمه کې د يوه بريښنا بند د جوړيدو چارې په عملي ډول پيل کړې. د دغه پروژې مسول انجينير محمد صادق صادق په کونړ کې دملي باور خبريال ته ويلي دي، چې په دې بريښنا بند نهه عشاريه وه ميليونه امريکايي ډالره لګول کېږي، چې د څلورو کلونو په موده کې به يې چارې بشپړې او ګټې اخستنې ته به چمتو شي چې دوه زره او سل کيلو واټه بريښنا به توليدوي، ددغه بريښنا بند ټول لګښت د اوبو او بريښنا وزارت له بوديجې ورکول کيږي.

  کونړ والي شجاع الملک جلاله خان چې دا په دې ولايت کې يوه کمسارې رغاونيزه پروژه يادوي او وايي ولس يې کلونه کلونه د دغه بريښنا بند دجوړيدو لپاره شيبې شمېرلې او که ورته بريښنا جوړه شي دا سيمه به له هره اړخه پرمختګ وکړي.

   جلاله خان چې وسله وال مخاليفين د ښونې او روزنې په برخه کې وستايل، ترې ويې غوښتل چې د بريښنا بند د جوړونې په برخه کې دې ورسره همغږي وه اوسي اوپه امنيت کې دې ورسره مرسته وکړي.

   د مشرانوجرګې يو غړى رفيع الله حيدري انديښمن دى چې په دا ډول پروژو کې ځينې خلک دخپلو شخصي امتيازاتو لپاره خڼدوه جوړوي، نوموړى د سيمې له مخورو غواړي چې د داسې دسيسو مخه ونيسي،  حيدري وايي د پروژې مسولانو ته ويلي دي چې هېچاته هم په يوه او بل نوم پيسې ورنه کړي، چې ګنې دپروژې کارونه به ورخراب کړي .

   د سيمې اوسيدونکي وايي مرکزي دولت نه غواړي، چې د کونړ پر سيندونو دې بريښنا بندونه جوړشي او دا اوس چې د مناګي بريښنا بند دجوړيدو چارې پيل شوې، دا هم دوى له ډېر ولسي ټينګار او ورپېښو ننګونو له امله دي، دوى وايي د کونړ پر بندونو په اسلام اباد، واشنګټن او وروستي ځل په لندن کې هم له ولسمشر کرزي سره خبرې وشوې، ولسمشر حامد کرزي هم څو وارې د کونړ د بريښنا بند د جوړېدو په برخه د دولت ژمنې تازه کړي دي .

    شنونکي وايي د کونړبريښنا بندونه دسياسي جوړجاړيوښکار دي. په کونړ کې يو پخوانى خبريال او د چارو شنونکى محمد ادريس غروال وايي د بريښنا وزير محمد اسمعيل خان په لوي لاس د دې بندونو په جوړيدو کې ځان شاته کړى و او تل يې نا امني يوه پلمه ګڼله په داسې حال وسله والو طالبانو او دحزب اسلامي جنګياليو هم دبريښنا بندونو له جوړيدو سره خپل ملاتړ اعلان کړى.

   غروال وايي دکرزي په واکمنۍ په هره غونډه کې د سره طاق د بند يادونه شوې خو دادى د کرزي دولس کلنه واکمني پاى ته رسېږي، خولاهم دغه ارمان د ولس په زړونو کې همداسې پاتې شو، نوموړى انديښمن دى چې که د کابل د چارواکو سياسي مصلحتونه همداسې وي، نو ډيرې ملي پروژې به وسوځي.

   بل لور د مناګي په برېښنا بند يوه لويه نيوکه داده، چې پخوا داتو زرو ميګاواټه بريښنا د ظرفيت ژمنه شوې وه، خو دغه کچه دوه زرو ته راټيټه شوه، د سيمې اوسيدونکي دا هم د بريښنا وزارت د چارواکو يو ناوړه شاتګ يادوي.