تاند- د حامد کرزي د حکومت د پنځو وزیرانو، چې په اختلاس او سو استفادې تورن شوي ول، دوسیې د بیا کتنې او څېړنې لپاره سترې محکمې ته ولېږل شوې.
د لویې څارنوالۍ ویندوی بصیر عزیزي د سې شنبې به ورځ په یوه خبري غونډه کې وویل چې د اقتصاد وزیر محمد امین فرهنګ، د سوداګرۍ وزیر عنایت الله قاسمي، د ترانسپورت وزیر حمید الله قادري، د کانونو وزیر صدیق ایشان او دغه راز د اقتصاد د بل وزیر جلیل شمس دوسیې یې سترې محکمې ته سپارلي دي.
د لویې څارنوالۍ ویندوی همداراز وویل چې یو شمېر نور پخواني وزیران هم دوسیې لري خو کله چې د هغوی دوسیې بشپړې شوې هاله به یې لویې څارنوالۍ ته وروغواړي.
د لویې څارنوالۍ ویندوی وویل چې څارنوالي د پخوانیو وزیرانو د دوسیو د څېړلو لپاره له قانون سره سم د ځانګړې محکمې د جوړېدو غوښتونکې ده.
لویې څارنوالۍ څلور کاله پخوا هم د دغو وزیرانو پر خلاف تورونه ولګول او دوسیې یې ورته پرانستې خو له پاسه څوک نه ول چې د هغوی د محاکمه کېدو لپاره محکمه معرفي کړي.
محمد امین فرهنګ، چې پخوا د اقتصاد او دغه راز د سوداګرۍ وزیر پاتې شوی دی، وايي کله چې څلور کاله پخوا دا ډول تورونه مطرح شول، تیار و چې محکمې ته لاړ شي او د قاضي پوښتنو ته ځواب ووايي خو محکمه جوړه نه شوه. دی وايي چې اوس هم حاضر دی چې د ځان دفاع وکړي.
د کانونو پخوانی وزیر محمد اېشان هم ورته خبره کوي او وايي چې پر ده لګېدلي تورونه ناسم دي.