تاند- د کندهار ښار په نننۍ چاودنه کې ۳ تنه وژل شوي او تر شلو ډېر نور ژوبل دي.
د کندهار د والي ویندوی صمیم خپلواک رسنیو ته وویل، چاودنه نن سهار د ښار په مرکزي برخه (میرویس مېنه) کې د پولیسو یوې حوزې ته نژدې وشوه.
په پیل کې ویل شوي و چې دا موټربمي چاودنه ده خو وروسته چارواکو وویل چې تراوسه پوري څه نه شي ویلی چې چاودنه انتحاري وه که د ځای پر ځای شوي بم.
تراوسه پوري کومې ډلې د دې برید مسوولیت په غاړه نه دی اخیستی.
د روانې اوونۍ په پیل کې په جلال اباد کې په یوه برید کې ۳۵ تنه ووژل شول او ۱۲۵ نور ژوبل شول.