د افغانستان د اسلامي جمهوریت د جمهوررئیس محمداشرف غني په مشرۍ نن (یکشنبه) له غرمې مخکې د کوچیانو او داخلي بې ځایه شویو عالي شورا غونډه په چهارچنار ماڼۍ کې جوړه شوه.
په دې غونډه کې د تخنیکي کمېټې د غونډو پر راپور، داخلي بې ځایه شویو سره د عاجلو بشري مرستو او د هغو د وېش پر میکانیزم، داخلي بې ځایه شویو لپاره د همغږۍ او ځواب ویلو پر طرزالعمل، د داخلي بې ځایه شویو پر شمېرو، د کوچیانو لپاره دنمونه یي جوماتونو پر جوړولو، د څړځایونو د ثبت لار نقشې، علامه ګذارۍ او احیا او د کوچیانو د سرخېل ټاکلو پر طرزالعمل بحث وشو.
د افغانستان د ځمکو خپلواکې ادارې رئیس جواد پیکار، د کډوالو او راستنېدونکو چارو وزیر سیدحسین عالمي بلخي، د سیمهییزو ارګانونو خپلواکې ادارې رئیس عبدالمتین بېګ، د ارشاد، حج او اوقافو وزیر فیض محمدعثماني او د کوچیانو چارو د سمون لوی ریاست سرپرست ډاکټر حکمت الله عصمت په اجنډا کې د شاملو مواردو، نظریاتو او وړاندېزونو په اړه مفصل معلومات وړاندې کړل.
جمهوررئیس غني د یادو ویناوالو د خبرو له اورېدو وروسته وویل، کوچیان او داخلي بې ځایه شوي واضح بودجوي کوډ ته اړتیا لري او د کوچیانو د اسکانو په اړه باید اساسي قانون پلی شي.
جمهوررئیس ټینګار وکړ د کوچیانو د اسکانو او مالدارۍ د احیا لپاره باید یوه واضح طرحه وجود ولري. هغه د داخلي بې ځایه شویو په اړه وویل: په دې اړه دې د مرکزي احصائیې اداره له نورو ادارو سره همکاري وکړي او د احصائیې مرکزي اداره دې اصلي معلوماتي مرجع وي.
هغه زیاته کړه، په افغانستان کې مکررو پېښو ته په پام، موږ یوه واضح ډیټابیس او منول یا لارښود ته اړتیا لرو.
د هېواد جمهوررئیس څرګنده کړه، بین المللي ارګانونه دې د د اخلي بې ځایه شویو په اړه له یوې واحدې مرجع څخه خپلې مرستې وکړي.
جمهوررئیس زیاته کړه، د هغو بې ځایه شویو ترمنځ چې د بېرته ستنېدو او یا اقامت هوډ لري باید واضح توپیر رامنځته شي، ترڅو په دې برخه کې اقدامات وشي.
جمهوررئیس غني وویل: د استطاعت وړ د استوګنې پروژې پر طرحې کار دوام لري چې وکولای شو د داخلي بې ځایه شویو په اړه اقدام وکړو.
د هېواد جمهورئیس کوچیانو لپاره د نمونه يي جوماتونو د جوړولو په اړه وویل، کوچیانو سره په مشوره دې د ارشاد، حج او اوقافو وزارت، د علماو سرتاسري شورا او د سیمهییزو ارګانونو خپلواکه اداره پر نمونه يي جوماتونو کار وکړي.
جمهوررئیس د څړځایونو په اړه وویل، د څړځایونو سیمه باید تثبیت شي او سیمهییزه ادارې وظیفه لري چې د څړځایونو ساتنه وکړي او هممهاله دې د هغو د تثبیت او ساتنې پر پلان کار وکړي.
محمداشرف غني وویل، پر څړځایونو د شخړو د حل لپاره باید د ولایت او زون په کچه کمېسیونونه جوړ شي چې شخړې حل شي. هغه زیاته کړه: لانجمنې سیمې دې له هغو سیمو سره چې همکاري ورکې شتون لري، تفکیک شي، ترڅو له څړځایونو څخه په سمه توګه استفاده وشي.
جمهوررئیس د کوچیانو د سرخېل د ټاکلو د طرزالعمل په اړه وویل، کوچیان د سوداګرۍ، مالداري، انتقالاتو او ترانسپورت ظرفیت لري او له دې ظرفیتونو څخه باید استفاده وشي.
دغه راز د کوچیانو او داخلي بې ځایه شویو عالي شورا غونډې د کوچیانو د سرخېل د ټاکلو طرزالعمل تائید کړ.