تاند- د کډوالو لپاره د ملګروملتو لویې کمیشنرۍ یا یو این ایچ سي آر له نړیوالې ټولنې وغوښتل چې له افغان کډوالو سره مرستې جاري وساتي.
دې کمیشنري ویلي چې روان ۲۰۱۴ کال، چې د امریکا په مشرۍ نړیوال ځواکونه له افغانستانه وځي، د افغانستان لپاره ډېر حساس کال دی.
د فرانس پریس خبري اژانس د راپور له مخې د کډوالو لپاره د ملګروملتو لوی کمیشنر انتونیو ګویتیریس د ایران د دوه ورځني سفر په پای کې وویل:«۲۰۱۴ کال د افغانستان د ثبات لپاره کلیدي اهمیت لري. نړۍ ناکام افغانستان نه شي زغملی.»
په افغانستان کې د جګړې د دوام، بې روزګارۍ او بېوزلۍ له کبله لا هم په ایران او پاکستان کې شاوخوا ۷ ملیونه افغانان له تېرو درو لسیزو راهیسي مهاجر دي.
د ایران د پولیسو په وینا په دغه هیواد کې شاوخوا یو ملیون غیرقانوني افغان کډوال مېشت دي خو ۵ لکه څلور لکه راجستر شوي دي.
د ملګروملتو د کډوالو لویه کمیشنري وايي، سږ کال به د هغو کډوالو لپاره د پیسو په راټولولو تمرکز وکړي چې په ایران کې راجستر شوي دي.
غیرحکومتي موسسې او د ملګروملتود کډوالو لویه کمیشنري وايی چې افغانستان د ناټو پوځیانو له وتلو وروسته په یوه وار د دومره ډېر شمېر کډوالو ورستنېدو ته تیار نه دی.
د افغانستان اقتصاد په بهرنیو مرستو ولاړ دی او وېره ده چې د بهرنیو پوځیانو له وتلو سره به هم مرستې لږې شي او هم به ډېر نور افغانان بې روزګاره شي.