تاند، پنجشنبه، د ثور ۴مه: افغانستان لپاره د ملګرو ملتونو د ځانګړې استازولۍ یوناما مشرې میرمن دیبوره لیوینز نن پنجشنبه رسما خپل کار پيل کړ.
د ملګرو ملتونو سرمنشي انتونیو ګوتیش دغه کاناډايي نژاده مېرمن د مارچ په ۲۴مه د تدامیچي یاماماتو پر ځای په کابل کې خپله استازې وټاکله.
اوس میرمن لیوینز له دندې پيلولو سره سم پر ټویټر د افغان سولې، بشري حقونو او خیر ښیګڼې په برخه کې له افغانستانه د ملاتړغوښتنه کړې ده: (( ویاړم چې افغانستان کې د ملګرو ملتونو د استازې په توګه کار پیلوم، ډیره لیواله یم چې له افغانستان څخه د سولې، بشري حقونو او رفاه په برخه کې د ملګرو ملتونو ملاتړ لا پیاوړی کړم.))
همدا راز په کابل کې د یوناما دفتر هم یوه اعلامیه خپره کړې او ویلي یې دي، چې مېرمن لیوینز په دې باور ده چې په افغانستان کې د جګړې او کورونا له بحران سره هم مهاله د سولې برابر شوي فرصت یوه هیله مندي رامنځته کړې ده.
میرمن لیوینز له ۲۰۱۳ څخه تر ۲۰۱۶ پورې په افغانستان کې د کاناډا سفیره پاتې شوې او په اسراییلو کې هم د خپل هیواد سفیره وه.
یوناما وايي، نوموړې به خپل کارونه کابل ته تر راتلو پورې له کاناډا څخه جاري ساتي.
د ولسمشر غني ویاند صدیق صدیقي د اغلې لیوینز په نوې دنده خوښي ښودلې او ویلي یې دي چې دا ډیره غوره ده چې میرمن لیوینز بیا کابل ته راروانه ده.