تاند- د هغو اماراتیانو جنازې نن /شنبه/ په یوه پوځي الوتکه کې متحده عربي اماراتو ته ورسول شوې چې د تېرې سې شنبې په ورځ د کندهار په چاودنه کې وژل شوي وو.
د متحده عربي اماراتو خبري اژانس وام وايي، په افغانستان کې د بشري ماموریت په لړ کې د وژل شویو اماراتیانو د جنازو مخې ته د دغه عربي هیواد جګپوړي چارواکي ورغلل.
د متحده عربي اماراتو مرستیال صدراعظم او د دولت ریاست د چارو وزیر شیخ عبدالله بن النهیان، د بهرنیو چارو او نړیوالې همکارۍ وزیر او یو شمېر نورو جګپوړو ملکي او پوځي چارواکو په مراسمو کط ګډون درلود.
وام وايي چې په الوتکه کې له ۵ وژل شویو اماراتیانو ځنې د ۴ مړي، چې د مړو د تشخیص د ځانګړې کمېټې له لوري پېژندل شوي وو راوړل شول.
په خبر کې ویل شوي چې د پنځم اماراتي (محمد علي زینعل الباستاکي) مړی نه دی پېژندل شوی. ویل شوي چې نوموړی په هغه ځای کې ناست و، چې چاودېدونکي مواد پکې اېښودل شوي وو.
اماراتي چارواکو د الباستاکي کورنۍ له دې موضوع خبره کړې ده او د نوموړی کورنۍ په داسي حال کې چې په دې خبر خواشیني ښکاره کړې ویلي دي چې بشري مرستو ته باید دوام ورکړای شي.