د ۷ میاشتني ماشوم قاتل پلار ونیول شو

تاند- هغه سړی ونیول شو چې په ننګرهار کې یې خپل ۷ میاشتنی زوی په خورا بې رحمۍ وژلی و.

د ننګرهار امنیه قوماندانۍ نن /چهارشنبه/ وویل دغه سړی، چې امان الله نومېږي، د خپل زوی د وژلو په تور په بهسود ولسوالي کې نیول شوی دی.

پولیس وايي، امان الله د بټي کوټ ولسوالي اوسېدونکی دی او اوس ترې تحقیقات روان دي.

امان الله رسنیو ته په مرکه کې د خپل زوی په قتل اعتراف کړی او ویلي یې دي چې په ځان نه شو پوی او زوی یې وواژه.

ده همداراز ویلي چې ذهني او عصبي ناروغي لري.

د ننګرهار امنیتي چارواکي وايي چې امان الله وروسته له دې خپل ماشوم زوی وواژه چې د سې شنبې په ورځ یې خپله ښځه طلاق کړه.