تاند- د افغانستان د بهرنیو چارو وزیر صلاح الدین رباني د متحده عربي اماراتو د باندنیو چارو وزیر عبدالله بن زاید ال نهیان ته وویل چې د کندهار د پېښې په اړه جدي څېړنې کېږي او له امارات سره یې بشپړ جزییات شریکوي.
د تېرې اوونۍ د سې شنبې په ورځ /جنوري ۱۰/ د کندهار د مېلمستون په چاودنه کې د متحده عربي اماراتو ۵ بشرپال دیپلوماتان ووژل شول او سفیر یې سخت ټپي شو.
ښاغلی رباني، چې د ولسمشر غني له لوري د یوه افغان پلاوي په ډله کې متحده عربي اماراتو ته تللی څو د دغه هیواد له ملت او حکومت سره د دوی د دیپلوماتانو د وژل کېدو په خاطر غمرازي وکړي، اماراتي چارواکو ته د افغانستان د ولسمشر او ولس له لوري د غمرازۍ د څرګندولو ترڅنګ وویل چې افغانان له ډېرو کلونو راهیسي د تروریزم او سختدریځۍ قربانیان دي ځکه د اماراتیانو درد احساسولی شي.
د کندهار په چاودنه کې د دغه ولایت مرستیال والي عبدالعلي شمسي، یما کرزی، هاشم کرزی او د ۵ اماراتي دیپلوماتانو په ګډون ۱۲ تنه ووژل شول.
د افغانستان د ملي امنیت ریاست وايي چې د دوی لومړني معلومات ښيي چې دا برید کوټې ښار ته په غځېدلې لاره کې په کندهاري مدرسه کې پلان شوی و.