روغتیا وزارت: د سروبي د کورونا مشکوکو پېښو په اړه جدي پلټنې روانې دي

تاند، چهارشنبه، د حمل ۲۶مه: تاند ته د کابل سروبي ولسوالۍ سرچینو یو لیست استولی دی چې په دغه سیمه کې د کورونا له کبله لږ تر لږه ۳۵ کسان په یوه اوونۍ کې مړه شوي دي، خو د عامې روغتیا وزارت وايي، په دې اړه به خپلې څېړنې وکړي.

د سروبي اوسېدونکی او د ولسي جرګې پخوانی غړی سنګین توکلزی تاند ته وايي، یوازې تېره ورځ اته تنه مشکوک کسان د دغې ناروغۍ له امله مړه شوي دي.
نوموړی وايي، دا لږ تر لږه ۳۵ مړي له یوې اوونۍ راهیسې په سروبي کې شوي دي، په داسې حال کې چې د ننګرهار ولایتي روغتون څو ورځې وړاندې یوازې ۳ د کورونا مثبتې په سروبي کې تثبیت کړې.

د توکلزي په خبره د کابل د عامې روغتیا د رئیس په مشرۍ پلاوی دغه ولسوالۍ ته رسېدلی دی او دوه ښوونځي یې د ناروغانو د قرنطین لپاره ځانګړي کړي دي: (( د سروبي خپل طبي امکانات او پرسونل په نشت حساب دی.))

په سروبي کې د ۲۰۱ سیلاب قول اردو یو صحي چارواکی هم د نوم نه ښودلو په شرط تاییدوي چې په دغه ولسوالۍ کې له یوې اوونۍ راهیسې نږدې ۳۰ مړي شوي دي، خو معلومه نه ده چې ترشا یې څه کیسه ده: (( موږ خپل ګارنیزیون او قرارګاه د خلکو پرمخ وتړله، څو ورځې وړاندې دغه ولسوالۍ ته یو کس راغلی و چې له هغه وروسته کورونا خپره شوه.))

بلخوا د عامې روغتیا وزارت چارواکي تاند ته وايي، سروبي کې نه یوازې د کورونا د وروستیو مشکوکو پېښو او مړینو څېړنه کوي بلکې دغه ولسوالۍ کې به ډېر ژر د کورونا د درملنې یوه شل بستریزه څانګه هم په کار پیل وکړي.

ددغه وزارت ویاند وحید الله مایار تاند ته وویل، دغه ولسوالۍ ته یې یو پلاوی هم استولی دی چې د مړو په اړه پلټنه وکړي: ((دغه پلاوي د ولسوالۍ له خلکو او د روغتونو له مسوولینو سره تر لیدنې وروسته د یاد وزارت وزیر ته معلومات ورکړي چې هغه سم له واره په دې ولسوالۍ کې د کورونا ویروس د یوه شل بستریزه ځانګړې څانګې جوړېدو امر ورکړی دی.

هغه زیاته کړه، د عامې روغتیا وزیر فېروز الدین فېروز پلاوي ته لارښوونه کړې چې نن چهارشنبه په دغه ولسوالۍ کې د کرونا وېروس لپاره یوه څانګه پرانیزي، اړین امکانات به ورته برابرېږي او نوي مسلکي کارکوونکي به هم ورته وګوماري.