د زابل پر روغتون د طالبانو موټربمي برید ۲۰ ملکیان وژلي او تر ۹۵ ډېر ژوبل کړي

تاند، پنجشنبه، د سنبلې ۲۸مه: د زابل ولایت چارواکي او وشاهدان وايي چې په کلات کې د طالبانو په حمله کې د زابل روغتون ویجاړ شوی دی.

ظاهراً د طالبانو د برید هدف د ملي امنیت ریاست ښودل شوی و.

د زابل د ولایتي شورا رئیس عطا جان حقبیان له رسنیو سره په خبرو کې ویلي، پېښه کې تر اوسه ۲۰ کسان وژل شوي او له ۹۵ زیات دوی روغتونو ته رسولي دي: (( لږتر لږه اته ټنه چاودیدونک توکي په دې موټر بم برید کې کارول شوي وو، د مړو او ټپیانو شمېر شاید زیات شي، زیاتره تلفات پایوازانو، ناروغانو او ملکیانو ته اوښتي دي.))

نوموړی وايي، په برید کې د ملکي روغتون ټول تاسیسات له منځه تللي دي: «سهار شپږ بجې یې د ملي امنیت پر دیوال موټر بم برید وکړ، خو د امنیت ملي تاسیسات له دغه ځایه لرې دي مګر د شفاخانې ورته نږدې دي چې ټول له منځه تللي دي.»

نوموړي په مرکزي حکومت غږ کړی چې د ټپیانو د انتقال لپاره دې زابل ته ژر تر ژره الوتکې او مرستې ور واستوي: (( تلفات بیخي زیات دي، وعده راکول شوې چې هلیکوپټرې در استوو، خو که څوک رانغلل نو زابل کې خصوصي روغتونونه هم نشته تلفات به ډېر شي.))

ځايي خبریالان او اوسېدونکي هم وايي، چې چاودنه دومره زوروره وه چې له کبله یې تر څنګ روغتون له منځه تللی او په کورونو کې هم ګڼ خلک ټپیان شوي دي.

طالبانو د برید مسوولیت په غاړه اخیستی دی.

دا به دوه میاشتو کې د طالبان څویم لوی برید دی چې د هېواد په مختلفو ښارونو کې یې ترسره کوي.

دغه راز امنیتي ځواکونو هم ویلي چې د طالب وسله والو پر ضد یې خپل عملیات چټک او سخت کړي دي.