تاند- دا د عراق د پلازمېنې بغداد یو لوبغالی دی. زرګونه عراقیان په دې لوبغالي کې د ایران د سپاه پاسداران د قدس ځواک د قوماندان قاسم سلیماني د حضور پر ضد شعارونه ورکوي.
دوی وايي«زه عراقي یم، زه عراقي یم، پر قاسم سلیماني دې لعنت وي.»
د ایران قدس ځواک د دغه هیواد د سپاه پاسداران هغه څانګه ده چې په بهرنیو هیوادونو کې پوځي مداخله کوي. دې ځواک زرګونه افغانان سوریې ته په زور او رضا لېږلي چې د بشار اسد د رژیم ملاتړ وکړي.
له څه باندې یوې میاشتې راهیسې د عراق په شیعه مېشتو سیمو کې د ایران د لاسوهنو پر ضد مظاهرې روانې دي چې په نتیجه کې یې د دغه هیواد صدراعظم استعفا ته اړ شوی دی. په دغو مظاهرو کې په لسګونو شیعه عراقیان وژل شوي دي.
دوی وايي، شیعه مذهبه دي خو عراقیان دي او د دې معنا دا نه ده چې په خپلو ملي او هیوادنیو چارو کې د ایران مداخله ومني.
ایران ادعا کوي چې عراقیان د امریکا له لوري لمسول شوي دي خو دا نه وايي چې څرنګه کېدای شي چې ولس د یوه داسې هیواد له لوري ولمسول شي چې نه په خټه عرب وي، نه یې ژبه عربي وي او نه په دين مسلمان وي او نه یې مذهب شیعه وي.