تاند- ټاکل شوې ده چې د افغانستان لپاره د امریکا د بهرنیو چارو ځانګړی استازی زلمی خلیلزاد نن /جمعه/ سیمې ته راورسېږي.
زلمی خلیلزاد به، چې د افغانستان د سولې او پخلاینې په اړه سیلامشورې کوي، د دې سفر په لړ کې سعودي عربستان، قطر، متحده عربي اماراتو، پاکستان او افغانستان ته لاړ شي.
که څه هم تېره میاشت زلمی خلیلزاد له ټاکل کېدو سره هممهاله د امریکا له بهرنیو چارو وزیر مایک پامپیو سره اسلام اباد او نوي ډیلي ته لاړ خو دا به د ځانګړي استازي په توګه د سولې د هلوځلو لپاره د ده لومړنی سفر وي.
خلیلزاد په افغانستان او عراق کې د سفیر او په ملګرو ملتونو کې د امریکا د متحدو ایالتونو د استازي په توګه دندې ترسره کړي دي.
دی لومړنی افغان الاصل امریکايي دی چې په متحدو ایالتونو کې دومره لوړو پوستونو ته رسېدلی دی.