تاند- د زیمبابوې د کرکټ ملي ټیم له افغانستان څخه دوهمه یو ورځینۍ مسابقه په ۸ ویکټونو وګټله.
په دې مسابقه کې د عثمان غني د ښې لوبې له کبله هیله کېده چې افغانستان به ممکن ګټونکی شي خو د زیمبابوې دوو لومړیو لوبغاړو په یوازې توګه ۲۲۴ منډې جوړې کړې او د بري لپاره یې د افغانستان د ټیم هیلې په نهیلۍ بدلې کړې.
د زیمبابوې سکندر رضا ۱۴۱ منډې وکړې. له ده سره ایچ ایم ماساکدزه ښه ملګرتوب وکړ. ماساکدزه ۹۳ منډې جوړې کړې.
د افغانستان په ټیم کې عثمان غني په ۱۴۳ توپونو ۱۱۸ منډې جوړې کړې. له دغه ۱۷ کلن لوبغاړي پرته نور افغان لوبغاړي ژر ژر وسوځېدل.