سرخط؛ ملا منان بيا د کوټې شورا ته ګوته څنډلې

دا پلو د حکومت مشران د بلخ له‌پاره له خپل والي څخه ښه ورځ نه لري، ها پلو د کوټې شورا ته د هلمند ځان‌بولی والي ملامنان بلا شوی او يوه نه بله ورځ ورته ګوته څنډي.
سرخط ته د ملامنان اخوند يو ليک او يو غږيز کليپ په لاس ورغلی چې په دواړو کې يې د کوټې شورا تر اور لاندې او د امارت مشران تر ګرېوان نيولي دي.
په دغه کليپ کې ملا منان د کندوز له‌پاره د طالبان د والي ملا سلام وژل کېدل د امارت داخلي ستونزې، کشالې او د نويو مشرانو کمزوري بولي او په دې سربېره ګواښ کوي چې که امارت سم نه شي، دی به خونړۍ پرېکړه وکړي.

ملا منان د نورو جګړ‌مارو طالبانو په استازي توب ګواښ کړی، که د طالبانو په ليکو کې د بدلونونو او برطرفي لړۍ و نه درول شي، د جګړې ليکو ته پام و نه شي او د دوی اصطلاح په غنيمت کې ونډه ور نه کول شي، دی به له مجبورۍ کومه خونړۍ پرېکړه وکړي.
له څه مودې راهيسې د طالبانو ليکو درزونه کړي او اوس يې خپلمنځي ستونزې او لانجې ورو ورو پسې پراخېږي.

د طالب یاغيانو په ليکو کې له دوو مياشتو راهيسې بدلونونه او برطرفۍ پيل شوې، هغه مشران چې د دوی له فرمانو سرغړونه کوي او يا هم طالبان د هغوی له نفوذ څخه په وېره کې شي، په مرموز ډول وژل کېږي او يا هم څنډې ته کېږي.
له بل لوري د طالبانو څو ګوښه شوي مشران وايي چې د دوی مشر ملا هبة الله هيڅ صلاحيت نه لري او نه هم له وضعيت څخه خبرېږي.

“ملا هبة الله يو سمبوليک مشر دی، نه د کوټې شورا او نه هم د پېښور شورا له پرېکړو خبرېږي، بلکې ځينې وخت خو له لويو لويو پرېکړو هم بې خبره ساتل شوی وي.”
اوس تازه سرخط ته په لاس ورغلی د هلمند ولايت د طالبانو د جنګي مسوول ملا عبدالمنان له لوري خپور شوی پيغام او پرېکړه ليک په ډاګه کوي چې د طالبانو په منځ درزونه نور هم ژوند شوي دي.

په پيغام او ليک کې راغلي چې په کندوز کې د ملا سلام د وژنې يو لامل هم د طالبانو ناسمه او غيرمسوولانه رهبري ده، همدا ناسمه رهبري لامل شوه چې په کندوز کې د ملا سلام او ملګرو د راټولېدو ځای په نښه او هغه له منځه يووړل شي.

ده ويلي، اساسي کسان هغوی دي چې د جګړې په لومړۍ کرښه کې په جګړه بوخت دي، خو ډېری داسې کسان شته چې د مشرۍ او رهبرۍ دعوې کوي، خو په پاکستان او نورو هېوادو کې په امن او ارامه فضا کې ناست دي، يوازې له هغو ځايونو څخه تشې اعلاميې خپروي او د جګړې له ليکو او د طالبانو په اړه هيڅ راز مالومات نه لري.
“دغو مشرانو هر ډول سياسي، مالي او نور امتيازات د امارت په برکت ترلاسه کړي، خو دوی بيا د ځينو طالب مشرانو چې د جګړې ليکې يې ګرمې ساتلې، قربانۍ يې ورکړې، د برطرفه کولو او بدلونونو خپل سرې پرېکړې کوي. که رهبري زما په ګډون د ځينو طالب مشرانو د بدلون او برطرفۍ په اړه له پرېکړو لاس په سر نه شي، په جګړه کې په تر لاسه شويو غنيمتونو کې مو ونډه را نه کړي، نو زه او د يو شمېر ولايتونو جنګي مشران به خپل دريځ په ډاګه ګړو.”

ملامنان ويلي، له ملاهبة الله سره يې مخالفت له طالبانو سره د مخالفت په مانا نه دی، خو هغه خپل مشران ننګوي چې د امارت امتيازات په بډه وهي.
ډېری طالب مشران او سرګروپان اوس له دې په اندېښنه کې دي چې د رهبرۍ ډېری کسان يې د پرديو د سياسي ګټو له‌پاره د امارت پر برخليک لوبه کوي او دوی يوازې استفاده کېږي، نو ځکه خو د امارت زوال نږدې شوی دی.

د سياسي چارو شنونکی عبدالهادي محسن وايي، د طالبانو په ليکو کې وروسته له هغه خپل سري او شخړې را پورته شوې چې پاکستان يې د مشرانو په واسطه د دوی پر سر له روسيې سره معامله وکړه.
دی زياتوي، ځينې طالبان له روسيې سره اډيالوژيکه ستونزه لري، نو ځکه نه غواړي د هغوی په ګټه وجنګېږي.
“د طالبانو پروژه نوره په ختمېدو ده، خو دا د حکومت له‌پاره يو طلايي چانس دی چې ګټه ترې واخلي. همدا طالبان په خپله ګټه وکاروي، د جګړې ليکې پرې ماتې کړي او په بله پروژه کې د استفادې مخه يې ډب کړي.”

د ملا منان هغه غږيز کليپ چې سرخط ته رسېدلی، د سرخط پر فېسبوک پاڼه يې اورېدای شئ.

#سرخط ورځپاڼه
#Sarkhat