تاند، شنبه، د قوس ۲مه: وروسته له هغې چې ډونالډ ټرمپ له طالبانو سره د سولې په هوکړه د کار خبر ورکړی، یو شمېر سرچینې هم تاییدوي چې زلمی خلیلزاد له طالبانو سره د بندو دروازو ترشا په پټه مذاکراتو ته رسېدلی دی.
سرچینې وايي، خلیلزاد دا مهال له طالبانو سره مذاکرات پیل کړي دي او امکان لیدل کېږي چې ډونالډ ټرمپ د دې اوونۍ تر پایه رسما د مذاکراتو د بیا پیل اعلان وکړي.
دا په داسې حال کې ده چې افغان حکومت ادعا کړې چې ښاغلي ټرمپ د مذاکراتو د بیا پیلولو لپاره اوربند شرط ګڼلی او د افغان حکومت اووه ماده ییزه طرحه یې تایید کړې ده.
د حکومت ټینګار دا دی چې امریکا غواړي افغان حکومت د مذاکراتو محوریت او مدیریت ته راشي، خو تر اوسه داسې څه په ظاهره نه لیدل کېږي.
بلخوا طالبانو هم تر اوسه نه ده تایید کړې چې د بندیانو له تبادلې وروسته یې له امریکایانو سره مذاکرات پيل شوي دي که لا هم پروسه په ټپه ولاړه ده.