خبریال: میرویس جلالزی
د سویلي کوریا دولت د افغانستان له دوو برخو سره د څه نا څه سل ملیونه امریکایي ډالرو مرستې اعلان وکړ.
د دغه هیواد سفارت په کابل کې وویل چې دوی د افغانستان د ښځو او کورنیو چارو وزارتونو سره د سل ملیونو ډالرو په ارزښت مرستي کوي.
د مرستو لومړۍ نیمایي به د ښځو پر ضد د تاوتریخوالي د را کمولو او د هغوي د وړتیاو د لوړولو لپاره د افغانستان په بیلا بیلو ولایتونو کې لګول کیږي.
په کابل کې د کوریا د سفیر چه یانګ چیل پر وینا چې د مرستو لومړۍ برخه یي ۴۳ ملیونه امریکایي ډالره ده چې په راتلونکو دریو کلونو کې به د افغانستان د افغان میرمنو د ژوندانه د ښه کولو او ښې حکومت ولۍ د ټینکولو لپاره لګول کیږي.
له دغو ۴۳ ملیونو ډالرو څخه به ۱۹ ملیونه د ملګرو ملتونو د پراختیایي اداري له لاری د ښځو د ژوندانه د ښه کولو، صحي مرکزونو ته د هغوي د لارسي د زیاتیدو او تر څنګ یي د ولایتي شورګانو د تقویي لپاره ولګول شي.
نږدي ۱۷ ملیونه نور به بیا د ملګرو ملتونو د ماشومانو د ملاتړ صندوق له لاري د میندو او ماشومانو د مړیني د کچې د راکمولو لپاره په مصرف ورسول شي. او پاتي نور به د ښځو پر وړاندي د تاوتریخوالي د راکمولو په برخه کې پانګه شي.
د نوموړي په خبره چې څه باند ۵۰ ملیونه نور ډالر به د کورنیو چارو وزات په چوکاټ کې د افغان پولیسو د تقویي او ملاتړ لپاره لګول کیږي.
د ښاغلي چیل په خبره چې تر ډیره به دا پیسي د افغان ښځينه پولیسو د روزني لپاره ولګول شي.
اوس مهاله د افغان پولیسو په لیکه کې شاوخوا ۲۵۰۰ تنه یي ښځینه دي چې ویل کیږي د ژوندانه حالت یي ډير سم نه دی.
ویل شوي چې تر ډیره بریده به دغه مرستي د ملګرو ملتونو سازمان له لاری په افغانسان کې د حکومت په نږدې ملګرتیا ولګول شي.
د سویلي کوریا دولت له تیرو څو کلونو راهیسي له افغانستان سره د سلګونو ملیونو ډالرو مرسته کړي چې د افغانانو د ژوندانه د ښه کولو لپاره ډیري موثري شمیرل کیږي.
دغه هیواد تیر کال د افغانستان د حکومت شاوخوا سل تنه حکومتي مامورین په بیلا بیلو برخو کې د روزني لپاره د دغه هیواد مرکز سیول ته بیولي ول او هغوي ته یي مسلکي روزني ورکړې.
سویلي کوریا اوس مهال د افغانستان په پروان کې یوه ملکي شفاخانه په واک کې لري او هلته افغانانو ته وړیا روغتیایي خدمتونه وړاندي کوي او تر څنګ یي د افغان کوریا په نامه یو روزنیز مرکز مشري هم کوي چې پکې ځوان کول افغانانو ته مسلکي روزنه ورکول کیږي.