سپاه پاسداران: هر هېواد ته چې امریکایان و څخه پر موږ برید وکړي، خونړی ځواب ورکوو

تاند، چهار شنبه، د جدي ۱۸مه: د ایران سپاه پاسدارانو په عراق کې د امریکایانو پر عین الاسد نظامي اډه له توغندیزو بریدونو وروسته خبرداری ورکړی که امریکا له دې وروسته د تاوتریخوالي لپاره یو ګام هم واخیست، ډېر دردوونکی ځواب به وویني.

سپاه پاسدارانو په یوه اعلامیه کې ویلي، د دوی فضايي ځواک د سلیماني په نوم بریالیو عملیاتو کې څو درجنه توغندي د عین الاسد پر نظامي اډه توغولي دي.

سپاه پاسدارانو د امریکا پر متحدینو هم غږ کړی چې هر څوک امریکا ته اډې ورکوي او امریکا د هر چا خاوره د دوی پر ضد استعمال کړه، ایران به یې پر ضد خونړي اقدامات وکړي.

سپاه پاسداران همدا راز وايي، ایران د اسراييلو حکومت په هیڅ ډول د امریکا د جرایمو له شراکت څخه نه شي ایستلی او دغه هیواد به هم په نښه کړي: (( موږ امریکا ته خبرداری ورکوو چې د لا زیات تاوان څخه د بچ کېدو لپاره دې له سیمې خپل پوځیان وباسي، تر څو د خپلو سرتېرو ژوند تر دې زیات د مرګ له ګواښ سره مخ نه کړي.))

دا په داسې حال کې ده چې ایران تېره شپه دوه بجې په عراق کې د امریکایانو دوه نظامي اډې په لسګونه توغندیو وویشتې چې امریکا یې د تلفاتو په اړه لا تر اوسه څه نه دي ویلي.

د امریکا د دفاع وزارت ویاند جاناتن هافمین تاییدوي چې په الاسد او اربیل نظامي اډو یې بریدونه شوي دی خو د امریکا ولسمشر ډونالډ ټرمپ بیا هر څه سم یاد کړي دي.