تاند، سه شنبه، د قوس ۲۶مه: له ماشومانو د ملاتړ نړیوال صندوق یونیسف وايي، افغانستان په ۲۰۱۹ کال کې د ماشومانو لپاره تر ټولو خونړی هېواد و.
د دې نړیوال بنسټ اجرائیوي مشره هنریته فور وايي، د روان ۲۰۱۹ کال په ۹ میاشتو کې هره ورځ ۹ ماشومان یا وژل شوي یا یې د بدن کوم غړی له لاسه ورکړی دی، چې دا د ماشومانو پر وړاندې د تېر کال د تاوتریخوالي په نسبت ۱۱ سلنه زیاتوالی ښيي.
میرمن فور وايي، دا پېښې د ځانمرګو بریدونو، چاودنو او له افغان ځواکونو سره د مخالفانو د نښتو د زیاتېدو له کبله ډېرې شوې دي: (( باید په عاجل ډول اقدامات وشي تر څو دا ناخوالې او مصیبتونه له منځه ولاړ شي.))
د یونیسف د تازه راپور له مخې دا مهال ۳ میلیونه او ۸۰۰ زره افغان ماشومان جدي بشري مرستو ته اړ دي چې له دې منځه یې ۶۰۰ زره په خوارځواکۍ اخته دي.