تاند، جمعه، د ثور ۱۲مه: له ماشومانو د ملاتړ نړیوال بنسټ یا سیف دي چلډرن وايي، د ۲۰۲۰ کال په اپریل او می میاشت کې به د افغانستان ۷ میلیونه او ۳۰۰ زره ماشومان د خوړو له کمښت سره مخامخ شي.
د دغه سازمان په تازه راپور کې راغلي، په داسې وخت کې چې د افغانستان ماشومان د خپل بدن د ایمني سیسټم د پیاوړتیا لپاره اړتیا لري په دغه هیواد کې د قرنطین له امله بیې لوړې شوې دي او خلک کورونو ته د خوړو برابرولو کې له ستونزو سره مخ دي.
دغه سازمان ویلي، د کورونا له بحران سره په افغانستان کې له پنځو میلیونو زیاتو ماشومانو بشري مرستو ته اړتیا لرله او دا جګړه ځپلی هیواد د بحران په اوږدېدو سره د ماشومانو لپاره په خطرناک هیواد بدلېدونکی دی.
د سیف دي چلډرن موسسې د افغانستان مسوول تیموتي بیشپ وايي، چې په افغانستان کې د قرنطین منفي تاثیرات دوه چنده زیات شوي دي او بې وزله خلک یې د خوړو له جدي ستونزې سره مخ کړي دي: (( موږ اندیښمن یوو چې د کورونا وبا په افغانستان کې د لوږې په یو توپان بدله نه شي، نړۍ باید افغانستان کې کورنیو ته د خوړو برابرولو لپاره جدي لاس په کار شي))
ښاغلی بیشپ وايي، معلومه نه ده چې د کورونا بحران څومره دوام کوي، خو په وینا یې هر څومره دوام که وکړي، افغانستان لپاره به خطرناکې پایلې ولري: (( زیاتو افغانانو ته کورونا دومره خطر نه دی لکه څومره چې لوږه د دوی ژوند ګواښي.))
دا په داسې حال کې ده چې افغان حکومت تازه له نړیوالو مرستندویانو سره د کورونا د بحران له کبله د اقتصادي ستونزو د مهال په اړه تماسونه نیولي او ګڼ لوري يې په افغانستان کې مرستو ته هڅولي دي.
دمګړۍ په افغانستان کې د کورونا مثبتې پېښې ۲۳۳۹ ته رسېدلي دي خو لوی او واړه ښارونه له یوې نیمې میاشتې راهیسې قرنطین یا نیمه قرنطین حالت کې دي.