تاند- راپورونه وايي چې وسله والو طالبانو د بادغیس جیوند ولسوالي نیولې ده.
د بادغیس د ولایتي شورا رييس بهاالدین قادیسي رسنیو ته نن وویل چې وسله والو طالبانو تېره شپه پر جیوند ولسوالۍ حمله وکړه او د ولسوالۍ مرکز یې ونیوه.
د ښاغلي قادیسي په وینا ولسوال او امنیه قومندان بلې سیمې ته تللي او که کومکي ځواک ورونه رسېږي ژوند یې له خطر سره مخامخېدای شي.
نور راپورونه وايي چې لا هم په جیوند ولسوالۍ کې نښته روانه ده.
د بادغیس د ولایتي شورا رييس وايي چې په جیوند ولسوالۍ کې، چې د مساحت له پلوه نسبتاً لویه ده، لږ شمېر پولیس ځای پرځای ول او د دولت وسله والو مخالفانو له همدې کمزوري ټکې څخه په استفادې دا ولسوالي نیولې ده.
ځیني راپورونه وايي چې وسله والو طالبانو د ولسوالۍ ودانیو ته اور ورته کړی دی خو وسله والو طالبانو تراوسه په دې اړه څه نه دي ویلي.
د کندهار په حمله کې ۷ تنه ووژل شول
له بلې خوا وسله والو طالبانو نن د کندهار د ملي امنیت د چټک غبرګون پر قطعې برید وکړ.
د کندهار امنیتي چارواکي وايي چې لومړی یوه تن د دې قطعې په خوله کې انتحاري برید وکړ، ورپسې درې نور ودانۍ ته ننوتل خو په نیم ساعت کې د امنیتي ځواکونو له لوري ووژل شول.
په دې پېښه کې پر څلورو انتحاریانو سربېره درې امنیتي ځواکونه وژل شوي دي.